आज:  | Thu, 26, Nov, 2020

जनताको जीवन रक्षा गर्न गम्भीरतापूर्वक लागेका छौँ : मुख्यमन्त्री राउत

बिरगंज सिटी १५ भाद्र २०७७, सोमबार ०८:००मा प्रकाशित (२ महिना अघि) २२०६ पाठक संख्या

प्रदेश २ का मुख्यमन्त्री लालबाबु राउतले कोरोना सङ्क्रमण नियन्त्रण र रोकथाममा कुनै कमीकमजोरी हुन नदिने प्रतिबद्धता व्यक्त गरेका छन् ।

कोभिड-१९ जोखिम न्यूनीकरणका लागि प्रदेश र जिल्ला तथा स्थानीय तहबीच समन्वय बैठकलाई आज सिरहाको लहानमा सम्बोधन गर्दै मुख्यमन्त्री राउतले कोरोना नियन्त्रणका लागि सबै उपाय अवलम्बन गर्न प्रदेश सरकार तयार रहेको बताए ।

पहिलो चरणमा जनकपुर, वीरगञ्ज र राजविराजमा कोरोना परीक्षण गर्ने मेसिन जडान भई परीक्षण भइरहेकामा अब प्रदेशका ८ वटै जिल्लामा कोरोना परीक्षण मेसिन खरिद गर्न रकम निकाशा भइसकेको बताउँदै मुख्यमन्त्री राउतले ५० वटा भेण्टिलेटर खरिद गर्ने गरी प्रक्रिया सुरु भइसकेको जानकारी दिए ।

‘कुनै पनि व्यक्तिलाई कोरोना सङ्क्रमणबाट मृत्यु हुन नदिन प्रदेश सरकारले हरेक उपाय अपनाएको छ,’ मुख्यमन्त्री राउतले भने, ‘जनताको जीवनभन्दा कुनै पनि कुरा ठूलो होइन, त्यसैले हामीले जनताको जीवन रक्षामा गम्भीरतापूर्वक लागेका छौँ ।’

सीमा नाकामा कडाइ गर्न नसक्दा प्रदेशमा कोरोना सङ्क्रमण तीव्र रूपमा फैलिएको बताउँदै उनले आफूहरूले कोरोना फैलिन नदिन प्रयास गर्दा गर्दै केही कमजोरीका कारण स्थिति नियन्त्रण बाहिर गएको जिकिर गरे ।

कोरोना नियन्त्रणका लागि गरिएको लकडाउनबाट मारमा परेका विपन्न, मजदुर र गरिब परिवारलाई राहत वितरणका लागि प्रदेश सरकारले समयमै रकम जिल्ला जिल्लामा पठाए पनि उचित व्यवस्थापन गर्न नसक्दा प्रभावकारी नभएको बताउँदै मुख्यमन्त्री राउतले कोरोना नियन्त्रण, रोकथाम र राहत वितरणका लागि महत्वपूर्ण निर्णय गरेपनि कार्यान्वयन हुन नसकेकाले समस्या भएको उल्लेख गरे ।

सामाजिक विकासमन्त्री नवलकिशोर साहले कोरोना नियन्त्रण र रोकथामका लागि प्रदेश सरकारले सङ्घीय सरकार र स्थानीय तहसँग समन्वय गरी अघि बढिरहेको बताए । उनले प्रदेश सरकारको एक्लो प्रयासले मात्र कोरोना नियन्त्रण हुन नसक्ने भएकाले सबैसँग समन्वय गरिरहेको बताए ।

बैठकमा पूर्वस्वास्थ्य राज्यमन्त्री डा. सुरेन्द्र यादव, प्रदेशका मुख्य न्यायाधिवक्ता दिपेन्द्र झा, सिरहा र सप्तरीका प्रमुख जिल्ला अधिकारी, प्रहरी प्रमुख, स्वास्थ्य प्रमुख तथा जनप्रतिनिधिको सहभागिता रहेको थियो ।