आज:  | Thu, 26, Nov, 2020

नारायणी अस्पतालका कोरोना सङ्क्रमितको सेवामा सिस्टर रोबोट

बिरगंज सिटी १५ भाद्र २०७७, सोमबार ०८:०३मा प्रकाशित (२ महिना अघि) २०८० पाठक संख्या

काठमाडौं। वीरगञ्जस्थित नारायणी अस्पतालमा उपचाररत कोरोना सङ्क्रमितलाई अब रोबोटले पनि सेवा दिने भएको छ। कोरोनाका विरामीलाई खाना, औषधि लगायतका आवश्यक सामान पुर्‍याउन त्यहाँ रोबोटको प्रयोग गर्न लागिएको हो। रोबोटबाट विरामीको सेवा गर्ने व्यवस्था मिलाएको हो सानो पाइलाले।

राष्ट्रिय आविष्कार केन्द्रको समन्वयमा निर्माण गरिएको सिस्टर रोबोट आज नारायणी अस्पतालका मेडिकल सुपेरिटेन्डेन्ट संजय ठाकुरलाई हस्तान्तरण गरिएको छ। खाना, औषधिलगायतका अत्यावश्यक सामान विरामीको शय्या सम्म पुर्‍याउन सहज होस् भनेर सिस्टर रोबोटको व्यवस्था गरिएको सानो पाइलाले जनाएको छ।

अब खाना, पानी औषधि लगायतका सामान पुर्‍याउन विरामीको शय्यासम्म स्वास्थ्यकर्मी नै जानुपर्ने अवस्था हुने छैन। सङ्क्रमित व्यक्तिलाई सिस्टर रोबोटको सहायताले आवश्यक सामान दिन सकिने छ। रोबोट सञ्चालनको प्रशिक्षण लिएका स्वास्थ्यकर्मीले टाढैबाट वार्डमा रहेका विरामीहरुको शय्यासम्म सिस्टर रोबोटमार्फत सामान पठाउन सक्ने छन्।

जसका लागि सानो पाइलाका नीति तथा विकास प्रमुख एवं भौतिकशास्त्रका वैज्ञानिक विक्रम उपाध्यायले रोबोट सञ्चालनको प्रशिक्षण पनि दिइसकेका छन्। “संक्रमितहरुसँग स्वाथ्यकर्मीहरुको सिधा सम्पर्क न्यून गर्न रोबोटले सहयोग पुर्‍याउने छ,” उपाध्यायले भने, “रोबोटका माध्यमले संक्रमितहरुको उपचारमा थप टेवा पुग्ने छ।”