बाराको कलैया उपमहानगरपालिका वडा नम्बर २४ श्रीपुरमा सञ्चालित मिनाक्षी एग्रोगेट क्रसर उद्योग बन्द गर्न माग गर्दै स्थानीयवासी तथा संघर्ष समितिले विरोध प्रदर्शन गरेका छन् ।
स्थानीयवासीले "क्रसर अविलम्ब बन्द गर", "क्षयरोगहरूको औषधि उपचारको जिम्मा ले", "गाउँघरमा क्रसर खोल्न पाइँदैन" र "वातावरण प्रदूषण गर्न पाइँदैन" जस्ता नाराहरू लगाउँदै प्रदर्शन गरेका थिए । संघर्ष समितिले क्रसर उद्योगका कारण गाउँमा स्वास्थ्य समस्या बढ्दै गएको भन्दै उद्योग तत्काल बन्द गर्न माग गरेको छ ।
क्रसर उद्योगको प्रदूषणका कारण स्थानीय १७ जना बालबालिका तथा जेष्ठ नागरिकहरू क्षयरोगबाट पीडित भएका छन् । त्यस्तै, दम, आँखा रोग, कान नसुन्ने, उच्च रक्तचापजस्ता समस्या समेत देखिन थालेको स्थानीय बताउँछन् ।स्थानीयका अनुसार, उक्त क्रसर उद्योगले गाउँमा धूलो, धुवाँ तथा ठूलो आवाजले जनधनको क्षति पुर्याउँदै आएको छ ।
उनीहरूले उद्योग तत्काल बन्द गर्न, कानुनी कारबाही गर्न र पीडितलाई क्षतिपूर्ति उपलब्ध गराउन माग गरेका छन् । संघर्ष समितिले स्थानीय प्रशासनलाई ज्ञापनपत्र बुझाउँदै समस्या समाधानका लागि दबाब दिने बताएको छ ।
स्थानीयले यदि तुरुन्त क्रसर बन्द नगरिए थप संघर्षका कार्यक्रम गर्ने चेतावनी दिएका छन् ।
-1729995576.jpeg)
