वीरगञ्ज । नेकपा (माओवादी केन्द्र) का मधेस प्रदेश इन्चार्ज मातृका यादवले आसन्न स्वतन्त्र विद्यार्थी युनियन (स्ववियु) निर्वाचन र ‘जनतासँग माओवादी’ अभियानलाई सफल पार्न एकताबद्ध हुन नेता–कार्यकर्तालाई निर्देशन दिएका छन् ।
स्ववियु निर्वाचनमा सक्रिय सहभागिता
सोमबार सम्पन्न नेकपा (माओवादी केन्द्र) पर्साको बैठकमा यादवले बारा र पर्सामा चैत ७ र ८ गते सञ्चालन हुने हुलाकी सडक केन्द्रित तराई–मधेस जागरण अभियानलाई सफल बनाउन सबै तहका नेता–कार्यकर्तालाई सक्रिय रहन आग्रह गरेका हुन्। साथै, मङ्गलवार हुने स्ववियु निर्वाचनमा अखिल क्रान्तिकारीका उम्मेदवारहरूलाई जिताउन पूर्ण रूपमा लाग्न निर्देशन दिएका छन् ।
जागरण अभियान र गणतन्त्रवादी प्रदर्शनमा सहभागिता
बैठकले ‘जनतासँग माओवादी’ अभियानलाई सफल पार्न सबै तहका कमिटी र जनवर्गीय सङ्गठनहरूलाई सक्रिय बनाउन सहमति गरेको छ। चैत १५ गते काठमाडौँमा हुने गणतन्त्रवादीहरूको जनप्रदर्शनमा पार्टीका नेता–कार्यकर्ताहरूलाई व्यापक सहभागिता गराउन बैठकले निर्णय गरेको छ ।
गणतन्त्र विरोधी शक्तिसँग सङ्घर्ष आवश्यक
प्रदेश इन्चार्ज यादवले सरकारको गलत कार्यशैली र गणतन्त्र विरोधी शक्तिहरूसँग सङ्घर्ष गर्न आम नागरिकको साथ आवश्यक रहेको बताउँदै नेता–कार्यकर्तालाई एकताबद्ध भएर अगाडि बढ्न आग्रह गरे ।
बैठकमा उपस्थित नेता–कार्यकर्ताहरू
बैठकमा माओवादी केन्द्रका केन्द्रीय सदस्यहरू, पूर्व प्रदेश कमिटी सदस्य, जिल्ला, पालिका कमिटीका नेता तथा जनवर्गीय सङ्गठनका प्रतिनिधिहरूको सहभागिता रहेको थियो। उपस्थित नेताहरूमा रामबाबु बैठा, छोटेलाल यादव, रामदरश कुश्वाहा, सुरेन्द्र गुप्ता, सबा अन्सारी, राजु बैठा, अमिताभ बच्चन दास, बालकृष्ण श्रेष्ठ, बलिराम साह, दुर्गा क्षेत्री, बाबुराम कौशिक, मोहम्मद कदम रसुल, विदुर गुप्ता, सोमबहादुर लामा, अष्ट बहादुर लोप्चन, प्रभाकर गुप्ता, प्रेस सेन्टर नेपाल मधेस प्रदेश अध्यक्ष नीरज पिठाकोटे मगर, पर्सा अध्यक्ष शिवनाथ यादव लगायत ५९ जना नेता–कार्यकर्ताहरूको उपस्थिति रहेको थियो ।
-1729995576.jpeg)
