वीरगञ्ज । नेशनल प्याब्सन पर्साद्वारा आयोजित जुनियर टी-२० क्रिकेट टूर्नामेंटको फाइनल खेल सोमबार नारायणी रंगशालामा सम्पन्न भएको छ। फाइनल खेलमा आईडियल स्कूलले ज्ञान निकेतन स्कूललाई पराजित गर्दै उपाधि जित्न सफल भएको हो।
आईडियलको शानदार प्रदर्शन
आईडियल स्कूलले टस जितेर पहिले ब्याटिङ गर्ने निर्णय गरेको थियो । पहिलो इनिङमा १० विकेट गुमाएर ११२ रन बनाएको आईडियलले ज्ञान निकेतनलाई ११३ रनको लक्ष्य दिएको थियो । जवाफमा ज्ञान निकेतनले १५ ओभरमा ८ विकेट गुमाउँदै मात्र ८२ रन बनाउन सक्दा आईडियल ३० रनले विजयी भयो ।
उत्कृष्ट खेलाडीहरूको सम्मान
प्रतियोगितामा विभिन्न विधामा उत्कृष्ट प्रदर्शन गर्ने खेलाडीहरूलाई सम्मान गरिएको थियो ।
- म्यान अफ द म्याच – प्रीतम कुमार (आईडियल स्कूल)
- बेस्ट बलर – बलिराम साह (ज्ञान निकेतन स्कूल)
- बेस्ट ब्याट्सम्यान – विश्वनाथ दास (माउन्ट हरमन स्कूल)
- बेस्ट विकेटकिपर – सदीक अन्सारी (आईडियल स्कूल)
- बेस्ट फिल्डर – समीर देवान (विधा सदन स्कूल)
- म्यान अफ द सिरिज – सरजैल अल्ली मन्सुरी (ज्ञानउदय स्कूल)
समापन समारोहमा उच्चस्तरीय उपस्थिति
समापन समारोहमा वीरगञ्ज महानगरपालिकाका उपमेयर इम्तियाज आलम प्रमुख अतिथिका रूपमा उपस्थित थिए। उनले विजेता, उपविजेता तथा उत्कृष्ट खेलाडीहरूलाई ट्रफी, मेडल तथा मायाको चिनो वितरण गरे । आलमले प्रदेश सरकारले खेलकुद क्षेत्रलाई उच्च प्राथमिकता दिएको बताउँदै, खेलाडीहरूको उज्ज्वल भविष्यका लागि सहयोग गर्न प्रतिबद्धता जनाए।
प्रतियोगिताको भव्य आयोजना
नेशनल प्याब्सन पर्साका अध्यक्ष रामराज श्रेष्ठले प्रतियोगितामा पर्सा जिल्लाका १६ विद्यालयका छात्रहरूको सहभागिता रहेको जानकारी गराए । समापन समारोहमा नेशनल प्याब्सनका केन्द्रीय उपाध्यक्ष डा. नन्दन यादव, सचिव इन्द्र देव शाह, पर्सा क्रिकेट संघका अध्यक्ष मनिष कुमार साह, प्रतियोगिताका संयोजक सन्तोष साह, विभिन्न विद्यालयका शिक्षक, विद्यार्थी, अभिभावक तथा सञ्चारकर्मीको उल्लेखनीय उपस्थिति रहेको थियो ।
-1729995576.jpeg)
