काठमाडौं । नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले पछिल्लो समय राजावादीहरूले गरिरहेका क्रियाकलाप संविधान विपरित रहेको बताएका छन् ।
राजधानीमा आयोजित एक पुस्तक विमोचन कार्यक्रममा बोल्दै उनले जनतालाई पुनः रैती बनाउन खोज्ने प्रयास भइरहेको दाबी गरे । ‘अहिले राजावादीहरूले जे गरिरहेका छन्, त्यो संविधान विपरित छ । जनतालाई फेरि रैती बनाउने दिशामा प्रेरित गरिँदैछ,’ प्रचण्डले भने, ‘सबै उत्पीडित वर्ग र समुदायको बढी जिम्मेवारी छ ।’
उनले राजावादीहरूलाई दरबारीया भन्दै अगाडि बढ्ने दुस्साहस नगर्न चेतावनी पनि दिए । ‘कालरात्रि फर्काउने सोच्न हुँदैन । कोत पर्व, भण्डारखाल पर्व, नेपालको नक्सा संकुचित पार्ने काम, राजा महाराजाहरूको बेइज्जतपूर्ण गतिविधि, नमिता–सुमिता हत्याकाण्ड, दरबार हत्याकाण्डजस्ता घटनाबारे युवाहरूलाई बुझाउन आवश्यक छ,’ उनले भने ।
प्रचण्डले संघीय लोकतान्त्रिक गणतन्त्रपछि जनताका धेरै अपेक्षा भए पनि ती पूरा हुन नसकेको स्वीकार गर्दै गम्भीर समीक्षा आवश्यक रहेको बताए । ‘राजनीतिक दल र नेताहरूले जनअपेक्षाअनुसार काम गर्न नसकेको साँचो हो । त्यसको समीक्षा गरी सुधारतर्फ लाग्नुपर्छ, जसका लागि माओवादी केन्द्र अग्रणी भूमिकामा छ,’ उनले जोड दिए ।
-1729995576.jpeg)
