काठमाडौँ । त्रिभुवन विश्वविद्यालय (त्रिवि) अन्तर्गतका आङ्गिक तथा सामुदायिक क्याम्पसमा आज स्वतन्त्र विद्यार्थी युनियन (स्ववियु) निर्वाचन हुँदैछ । विश्वविद्यालय क्याम्पसमा भने चैत ८ गते निर्वाचन हुनेछ ।
स्ववियु निर्वाचनमा अध्यक्ष, सचिव र कोषाध्यक्ष प्रत्यक्ष रूपमा निर्वाचित हुनेछन् । उपाध्यक्ष र उपसचिवसहित अन्य सदस्यहरू भने निर्वाचित २१ सदस्यहरूमध्येबाट चयन गरिनेछ । यदि कुनै सङ्गठनको बहुमत आयो भने उपाध्यक्ष र उपसचिव सोही सङ्गठनकै सदस्यबाट चयन हुनेछ, अन्यथा सहमतिमार्फत चयन हुनेछ । सहमति नबनेमा २१ सदस्यीय समितिले मतदान प्रक्रियामार्फत उपाध्यक्ष र उपसचिव चयन गर्नेछ ।
विशेषगरी विश्वविद्यालय क्याम्पसमा पहिलो पटक इलेक्ट्रोनिक भोटिङ मेसिन (ईभीएम) प्रयोग हुँदैछ । निर्वाचन समितिका अनुसार मतदानका लागि २० वटा ईभीएम मेसिनको व्यवस्था गरिएको छ ।
त्रिवि अन्तर्गतका विभिन्न क्याम्पसमा विद्यार्थीहरूले आफ्ना नयाँ प्रतिनिधि चयन गर्न मतदान गर्दैछन् । विश्वविद्यालय क्याम्पसमा २१ सदस्यीय स्ववियु निर्वाचित हुनेछ, जसमा ११ जना प्रत्यक्ष निर्वाचित हुनेछन् भने १० जना समानुपातिक प्रणालीबाट चयन हुनेछन् । त्रिवि क्याम्पसमा ६ हजार १४६ मतदाता रहेका छन्, जसले मतदान गरी नयाँ नेतृत्व चयन गर्नेछन् ।
निर्वाचनको पूर्वसन्ध्यामा रत्नराज्यलक्ष्मी (आरआर) क्याम्पसमा अनेरास्ववियुले तालाबन्दी गरेको छ । क्याम्पस प्रशासनले नक्कली परिचयपत्र जारी गरेको आरोप लगाउँदै अनेरास्ववियुले निष्पक्ष छानबिनको मागसहित तालाबन्दी गरेको हो ।
त्यसैगरी, अमृत साइन्स क्याम्पसमा आज हुने भनिएको निर्वाचन सुरक्षाका कारण स्थगित गरिएको छ । निमित्त क्याम्पस प्रमुख होमबहादुर बानियाँले सार्वजनिक सूचना जारी गर्दै निर्वाचन स्थगित गरिएको जानकारी दिएका छन् । सोमबार बोलाइएको बैठकमा केही विद्यार्थी सङ्गठन अनुपस्थित भएकाले निर्वाचन स्थगित गर्नु परेको सूचनामा उल्लेख छ ।
स्ववियु निर्वाचनको पारदर्शिता सुनिश्चित गर्न राष्ट्रिय मानव अधिकार आयोगले निर्वाचन प्रक्रियाको अनुगमन गर्ने भएको छ । निष्पक्ष निर्वाचन सुनिश्चित गर्न आवश्यक उपाय अपनाइने आयोगले जनाएको छ ।
विद्यार्थी राजनीतिमा महत्त्वपूर्ण मानिने स्ववियु निर्वाचन त्रिविका क्याम्पसहरूमा कत्तिको शान्तिपूर्ण र निष्पक्ष रूपमा सम्पन्न हुन्छ भन्नेमा सबैको चासो रहेको छ ।
-1729995576.jpeg)
