रौतहट । श्रोत नखुलेको नगदसहित रौतहटबाट दुई जना व्यक्ति पक्राउ परेका छन् ।
सशस्त्र प्रहरी बल, नेपाल नं. ११ गण हेडक्वार्टर रौतहटका अनुसार सोमवार साँझ करिब ६ बजे भारतबाट नेपालतर्फ आउँदै गरेको मोटरसाइकललाई चेकजाँच गर्ने क्रममा नगदसहित दुई जना पक्राउ परेका हुन् ।
रौतहटको ईशनाथ नगरपालिका–४ महुलिया सीमा नाकामा मधेश प्रदेश ०३–०३५ प ६५४५ नम्बरको मोटरसाइकललाई सशस्त्र प्रहरीको सीमा गस्ती टोलीले जाँच गर्दा श्रोत नखुलेको नगद फेला परेको हो । पक्राउ पर्नेमा रौतहटको परोहा नगरपालिका–५ का ३५ वर्षीय सहजाज देवान र राजपुर नगरपालिका–४ का ३२ वर्षीय शेख सम्सान रहेका छन् ।
सशस्त्र प्रहरी निरीक्षक संजित कुमार सिंहका अनुसार पक्राउ परेका व्यक्तिहरूको साथबाट रु. १,००० दरका ३०९ थान र रु. ५०० दरका १०० थान गरी कुल रु. ३,६९,००० (तीन लाख उनन्साठ्ठी हजार) नगद बरामद गरिएको छ ।
पक्राउ परेका व्यक्तिहरूलाई बरामद रकम र मोटरसाइकलसहित गौर भन्सार कार्यालय, रौतहटमा बुझाइएको छ । भन्सार मूल्यांकनअनुसार मोटरसाइकलको मूल्य रु. ३,००,००० कायम गरिएकाले कुल रु. ६,५९,००० (छ लाख उनन्साठ्ठी हजार) को आर्थिक कारोबारमा संलग्न रहेको आशंका गरिएको छ ।
यस विषयमा थप अनुसन्धान भइरहेको सशस्त्र प्रहरीले जनाएको छ ।
-1729995576.jpeg)
