एमालेबाट अलग भएका पूर्व प्रहरी महानिरीक्षक (आईजीपी) सर्वेन्द्र खनालले पर्सा, बारा र रौतहटका लघुवित्त पीडितहरूको भेला गर्दै उनीहरूको समस्या समाधानका लागि संघर्ष गर्ने प्रतिबद्धता गरेका छन् ।
वीरगंजमा आयोजित भेलामा खनालले सहकारी र लघुवित्त संस्थाहरूको शोषणविरुद्ध देशव्यापी आन्दोलन चर्काउने चेतावनी दिएका छन् । खनालले देशभर लघुवित्त तथा सहकारीविरुद्ध आवाज उठाइरहेका विभिन्न संघसंस्थासँग सहकार्य गरेर पीडितहरूको न्यायका लागि अभियान सञ्चालन गरिरहेको बताए ।
उनले सहकारी बचतकर्ता संरक्षण राष्ट्रिय अभियान, सहकारी शोषणविरुद्ध सङ्घर्ष समिति, पूर्व सुरक्षा परिषद् नेपाल, वित्तीय शोषणविरुद्ध किसान मजदूर आन्दोलन, मिसन नेपाल, संयुक्त उद्योगी कृषक समूह, वैदेशिक रोजगार ठगीविरुद्ध आन्दोलन महासङ्घ जस्ता संस्थाहरूसँग मिलेर सहकारी तथा लघुवित्त पीडितहरूको पक्षमा सशक्त संघर्ष गर्ने बताएका छन् ।
खनालले आफूले कुनै पनि लोभलालचका लागि यो अभियान नचलाएको स्पष्ट पारे । उनले प्रहरी महानिरीक्षक हुँदा पनि सरकारलाई लघुवित्त र सहकारीको अनियमितता रोक्न आग्रह गरेको तर सरकारले बेवास्ता गरेको आरोप लगाए । उनले 'देशका सहर, गाउँ, पहाड, हिमाल देखि तराईसम्म सबै क्षेत्रका जनता लघुवित्त तथा सहकारीको चर्को व्याजदर र ठगीको शिकार भएका छन् । तर, सरकार यस्ता संस्थाहरूलाई नै संरक्षण दिन व्यस्त छ । लघुवित्तको नाममा शोषण गर्नेहरूलाई सरकारकै गाडीमा चढाएर हौसला बढाइँदैछ ।'
खनालले सरकार र नियामक निकायहरूले उचित कदम नचाले अब पीडितहरूलाई गोलबद्ध गरेर देशभर आन्दोलन गर्ने घोषणा गर्ने बताएका थिए ।
लघुवित्त तथा सहकारी पीडितहरूले आफ्नो पीडा राख्दै अब प्रतिरोध गर्न बाध्य भएको बताए । भेलामा उपस्थित लघुवित्त ऋणीहरूले साना कर्जाका नाममा घरजग्गा जफत गर्नेसम्मको स्थिति आइसकेको गुनासो गरेका थिए ।
कार्यक्रममा नेपाल पत्रकार महासङ्घका अध्यक्ष ओमप्रकाश खनाल, कुशल केसी, शम्भु शर्मा, ललन कुर्मी, विकास अग्रवाल, उत्सव केसी लगायतका व्यक्तित्वहरूले मन्तव्य दिएका थिए ।
-1729995576.jpeg)
