नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले शान्ति सम्झौता र संविधानसभाबाट बनेको संविधानलाई छेडखानी गर्दै देशलाई गृहयुद्धमा धकेल्ने षड्यन्त्र भइरहेको दाबी गरेका छन् ।
बिहीबार नेकपा माओवादी केन्द्रको तराई–मधेस जागरण अभियान अन्तर्गत बारामा आयोजित सभालाई सम्बोधन गर्दै उनले संविधानमाथि हस्तक्षेप गर्दा देश पुनः द्वन्द्वतर्फ धकेलिने चेतावनी दिए ।
अध्यक्ष प्रचण्डले संविधानसभाबाट निर्माण गरिएको संविधानलाई मात्र विकासको आधार बनाउन सकिने बताउँदै यसलाई पछाडि फर्काउन नहुने धारणा राखे । उनले भने, "संविधानमा छेडखानी गर्ने भनेको शान्ति सम्झौतामाथि प्रहार गर्नु हो । यसले फेरि गृहयुद्ध निम्त्याउने खतरा बढ्छ ।"
उनले वर्तमान उपलब्धिहरू माओवादी आन्दोलनकै उपज भएको बताउँदै, "आज प्राप्त भएका अधिकारहरू हजारौं मधेसी, जनजाति, दलित, महिलालगायत उत्पीडित समुदायका सन्तानहरूको बलिदानबाट सम्भव भएको हो। त्यसैले यसको रक्षा गर्नु हाम्रो कर्तव्य हो," भने ।
पूर्वप्रधानमन्त्रीसमेत रहेका अध्यक्ष प्रचण्डले संविधानमा अझै पनि मधेस, दलित, जनजाति, महिला, मुस्लिम लगायतका समुदायको सम्पूर्ण हक सुनिश्चित हुन नसकेको बताए । "संविधानलाई अझ परिमार्जन गर्दै सबै उत्पीडित समुदायलाई थप अधिकार दिन आवश्यक छ," उनले भने ।
-1729995576.jpeg)
