सिरहाको औरही गाउँपालिकामा दलित समुदायको घर भत्काएको आरोपमा गाउँपालिका अध्यक्ष शिवजी यादव पक्राउ परेपछि पीडित परिवार विस्थापित भएका छन् ।
यादवका छोरा रुकेश यादवको धम्कीका कारण डोम समुदायका दीपक डोमको घरमा डोजर लगाई घर भत्काइएपछि उनीहरू अहिले बिचल्लीमा परेका छन् । रुकेश यादवले केही महिलाहरूलाई लिएर रातको समयमा दीपक डोमको टहरा घेर्न पुगेका थिए । सोही रात रुकेशको नेतृत्वमा आएको समूहले अछुत भन्दै डोम परिवारको टहरामा डोजर चलाएर उनीहरूलाई उठिबास गराएको पीडितहरूले बताएका छन् ।
डोम परिवार अहिले औरही गाउँपालिका वडा नम्बर–४ मा रहेको दलित आयोगका पूर्व सदस्य कवुली पासवानको घरमा शरण लिइरहेका छन् । दीपकका अनुसार, धम्की बढेपछि उनीहरू बालबच्चाहरूलाई प्रहरी चौकीमा छोडेर ज्यान जोगाउन श्रीमान–श्रीमती रातभर पासवानको घरमा लुकेका थिए । उनीहरू आफ्नै गाउँमा सुरक्षित रुपमा बस्न नसक्ने अवस्थामा पुगेका छन् ।
अध्यक्ष यादव र नेता दिलिप यादव पक्राउ
घर भत्काउने र धम्की दिने घटनामा संलग्न भएको आरोपमा सिरहा प्रहरीले शुक्रवार साँझ गाउँपालिका अध्यक्ष शिवजी यादव र जनमत पार्टीका नेता दिलिप यादवलाई नियन्त्रणमा लिएको छ । तर, अध्यक्षको गिरफ्तारीसँगै यादवका समर्थकहरूले जिल्ला प्रहरी कार्यालयमा तोडफोड र ढुंगामुढा गरेका छन् ।
पीडित परिवारका अनुसार, गाउँमा आयोजना गरिएको महायज्ञका क्रममा डोम समुदायलाई अछुतको व्यवहार गर्दै उनीहरूको घरमा डोजर चलाइएको हो । महायज्ञको नाममा गरिएको यो विभेदकारी गतिविधिले दलित समुदायमाथि गम्भीर अन्याय भएको भन्दै विभिन्न दलित अधिकारकर्मीहरूले विरोध जनाएका छन् ।
अध्यक्ष पक्राउ परेपछि प्रहरी कार्यालय सिरहाले थप सुरक्षा व्यवस्था कडा बनाएको छ । अध्यक्ष यादव र दिलिप यादवलाई अहिले हिरासतमा राखेर घटनाको विस्तृत अनुसन्धान भइरहेको जिल्ला प्रहरी कार्यालय सिरहाले जनाएको छ ।
यस घटनाप्रति दलित अधिकारकर्मी, मानवअधिकारवादी संस्था र स्थानीयवासीले विरोध जनाएका छन् । उनीहरूले गाउँपालिकामा विभेदविरुद्ध सचेतना अभियान चलाउन माग गरेका छन् । "महायज्ञको नाममा भएको यो अन्याय सह्य छैन । दोषीमाथि कानूनी कारबाही हुनुपर्छ," स्थानीय दलित अगुवाहरूले बताउँदै आएका छन् ।
यस घटनाले फेरि एकपटक तराई–मधेस क्षेत्रमा विद्यमान जातीय विभेदको मुद्दालाई सतहमा ल्याएको छ ।
-1729995576.jpeg)
