ट्विटरको पहिचान मानिने चर्चित ‘निलो चरो’ लोगो लिलामीमा बिक्री भएको छ ।
ट्वीटरका मालिक इलोन मस्कले यस सामाजिक सञ्जालको नाम र लोगो परिवर्तन गरी ‘एक्स’ राखेपछि अमेरिकाको सान फ्रान्सिस्कोस्थित ट्विटरको मुख्यालयमा यो लोगो लिलामीमा राखिएको थियो । सन् २०२२ मा इलोन मस्कले माइक्रोब्लगिङ प्लेटफर्म ट्विटरलाई ४४ बिलियन अमेरिकी डलरमा खरिद गरे मस्कले चराेलाइ उडाइदिएकाे भन्दै ट्विटरको नाम र पहिचानभएकाे चराेकाे सट्टा एक्स राखेका छन्र ।
ट्विटर खरिदगरेपछि उनले ट्विटरमा व्यापक परिवर्तन गर्न थालेका छन् । ‘निलो चरो’ हटाएर ट्विटरको नाम ‘एक्स’ मा परिवर्तन गर्नु पनि उनका बहुप्रतिक्षित योजनामध्येको एक हो । करीब २ सय ५४ किलो तौल र १२ फिट लामो तथा ९ फिट चौडाइ भएको यो विशाल निलो चरो लोगो ३४ हजार ३७५ अमेरिकी डलर अर्थात् झण्डै ४७ लाख नेपाली रुपैयाँमा बिक्री भएको हो । तर, लोगो किन्नेकाे नाम गोप्य राखिएको छ र खरिदकर्ताबारे कुनै जानकारी सार्वजनिक गरिएको छैन ।
‘एक्स’ नामक नयाँ ब्राण्डमार्फत मस्कले ट्विटरलाई बहुआयामिक एपमा रुपान्तरण गर्न चाहेका छन् । यो परिवर्तनसँगै ट्विटरको मुख्यालयमा रहेको निलो चरो लोगोको अस्तित्व पनि समाप्त भएको छ ।
यसअघि, मस्कले ट्विटरको मुख्यालयमा रहेका विभिन्न सामानहरू पनि लिलामीमा राखेका थिए । कम्पनीले कुर्सी, टेबल, डेस्कलगायत अन्य भौतिक सामग्रीहरू पनि बिक्री गरेको थियो । कम्पनीले यी लिलामीहरू आर्थिक व्यवस्थापन र नयाँ रणनीतिअन्तर्गत गरेको बताएको छ ।
ट्विटर खरिद गरेदेखि नै इलोन मस्कले विभिन्न विवादास्पद निर्णयहरू गर्दै आएका छन् । ब्लू टिक भेरिफिकेसनलाई सशुल्क बनाउनु, कर्मचारी कटौती गर्नु, ट्विटरको मोनिटाइजेसन नीति परिवर्तन गर्नुजस्ता कदमहरू उनका चर्चित निर्णय हुन् । ट्विटरको निलो चरो लोगो बिक्री भएको समाचार बाहिर आएपछि सामाजिक सञ्जालमा मिश्रित प्रतिक्रिया देखिएको छ । कतिपय प्रयोगकर्ताले यसलाई ‘ट्विटरको पहिचानको अन्त्य’ भनेका छन् भने केहीले मस्कको नयाँ रणनीतिलाई स्वागत गरेका छन् ।
-1729995576.jpeg)
