गोठाटारमा दुई वर्षअघि भएको लाल मोहम्मद हत्यामा संलग्न भएको आरोपमा पक्राउ परेका गुड्डु पटेललाई पुर्पक्षका लागि थुनामा पठाउने आदेश भएको छ ।
जिल्ला अदालत, काठमाडौंका न्यायाधीश तीर्थराज केसीको इजलासले आइतबार पटेललाई थुनामा राख्न आदेश दिएको हो ।
उपत्यका अपराध अनुसन्धान कार्यालय, टेकुले मोहम्मद हत्यामा संलग्न सुटर पटेललाई १८ फागुनमा गोली हानी पक्राउ गरेको थियो । सर्लाहीको गोडैता नगरपालिका–१०, मनहर्वा स्थायी घर भएका मोहम्मद २०७९ असोज ३ गते गोठाटारमा अज्ञात व्यक्तिको गोली प्रहारबाट मारिएका थिए ।
प्रहरीका अनुसार, फरार आरोपीको खोजी गरिरहेको टोलीले पटेल नेपाल आएको सूचना पाएपछि पिछा गर्दा उनलाई नियन्त्रणमा लिन गोली चलाउनु परेको थियो। पक्राउपछि ट्रमा सेन्टरमा उपचार गराएर प्रहरीले उनलाई अदालतमा पेश गरेको थियो ।
मोहम्मदलाई भारतीय सुरक्षा निकायले नक्कली नोट कारोबारमा संलग्न रहेको आरोप लगाउँदै आएको थियो। भारतीय प्रहरीले उनलाई नेपाल प्रहरीले हस्तान्तरण गर्नुपर्ने माग पटक–पटक राखेको थियो ।
हत्या हुनु एक हप्ता अघि मोहम्मदले आफूलाई सुरक्षा चुनौती रहेको भन्दै स्थानीय प्रहरी बिटलाई खबर गरेका थिए । तर, प्रहरी प्रशासनले उक्त सूचना गम्भीर रूपमा नलिएको बताइएको छ ।
पहिले पनि हत्या आरोपमा जेल परिसकेका मोहम्मद मारिनुअघि गोठाटारमा गार्मेन्ट उद्योग सञ्चालन गरिरहेका थिए ।
-1729995576.jpeg)
