वीरगंज उद्योग वाणिज्य संघको अध्यक्षमा हरि गौतम निर्विरोध निर्वाचित भएका छन् । संघको पदाधिकारी निर्वाचन सर्वसम्मत रूपमा सम्पन्न भएको हो ।
संघको वरिष्ठ उपाध्यक्षमा माधव राजपाल, द्वितीय उपाध्यक्षमा मनोज दास, महासचिवमा शिवजी प्रसाद कलवार, कोषाध्यक्षमा अनोज रुंगटा, सचिवमा प्रेमचन्द्र गोयल र सुशान्त चाचान, सह-कोषाध्यक्षमा निरज अग्रवाल निर्विरोध निर्वाचित भएका छन् । त्यस्तै, सहसचिवमा नरेश टिबडेवाल निर्विरोध चयन भएका छन् भने अर्का सहसचिवमा अनुप अग्रवाल निर्वाचनबाट विजयी भएका छन् ।
नवनिर्वाचित अध्यक्ष गौतमले निर्वाचन प्रक्रियामा प्रत्यक्ष वा अप्रत्यक्ष रूपमा सहभागी सबैलाई धन्यवाद ज्ञापन गर्दै आगामी दिनमा संघलाई थप प्रभावकारी बनाउने प्रतिबद्धता जनाएका छन् । उनले उद्योगी तथा व्यवसायीहरूको हकहित संरक्षण गर्दै आर्थिक समृद्धिका लागि संघलाई बलियो बनाउने लक्ष्य रहेको बताए ।
संघको विधानअनुसार १२ जना पदाधिकारी रहने व्यवस्था छ, जसअनुसार निवर्तमान अध्यक्ष स्वतः पदाधिकारीको रूपमा रहने छन् । साथै, तृतीय उपाध्यक्ष (रोजगारदाता समितिको संयोजक) को मनोनयन नयाँ कार्यसमितिको पहिलो बैठकले गर्नेछ । प्रमुख निर्वाचन अधिकृत बालमुकुन्द खरेलका अनुसार निर्वाचन स्वच्छ र व्यवस्थित रूपमा सम्पन्न भएको छ ।
वीरगंज उद्योग वाणिज्य संघ नेपालकै प्रमुख व्यापारिक संस्थामध्ये एक हो, जसले स्थानीय व्यवसायीहरूका हित संरक्षण, व्यापार प्रवर्द्धन तथा औद्योगिक विकासमा महत्वपूर्ण भूमिका खेल्दै आएको छ ।
-1729995576.jpeg)
