मधेश प्रदेशका मुख्यमन्त्री सतिशकुमार सिंहले जनकपुरधामका होटलहरूको अनुगमन गर्ने क्रममा मानव स्वास्थ्यलाई हानि पु¥याउन सक्ने बासी, अशुद्ध र म्याद गुज्रिएका खाद्य सामग्री फेला परेका छन् ।
आइतबार राति मुख्यमन्त्री सिंहको नेतृत्वमा भूमि व्यवस्था, कृषि तथा सहकारी मन्त्रालय, खाद्य प्रविधि तथा गुण नियन्त्रण कार्यालय र घरेलु तथा साना उद्योग कार्यालयको टिमले जनकपुरका दर्जनभन्दा बढी होटलको आकस्मिक अनुगमन गरेको हो । अनुगमनको क्रममा विभिन्न होटलमा सरसफाइ मापदण्डको उल्लङ्घन र बासी तथा अखाद्य सामग्री प्रयोग भएको पाइएको छ ।
किरा परेको दाल र बासी खाना
घरेलु तथा साना उद्योग कार्यालयका प्रमुख सन्तोष साहका अनुसार अनुगमनका क्रममा हंसराज स्वीटबाट उत्पादनकर्ता कम्पनीको नाम, उत्पादन मिति र म्याद समाप्त हुने मिति उल्लेख नभएका ११ प्याकेट फ्रोजन मःम बरामद गरी नष्ट गरिएको छ । न्यू जानकी भ्यू होटलबाट बासी तरकारी, किरा परेको दाल र खुला ठाउँमा जथाभावी राखिएको तरकारी फेला परेको छ । त्यस्तै, लक्ष्मी मिष्ठान्न भण्डारमा अनुगमन गर्दा १० किलो किरा लागेको मैदा फेला परेपछि तत्कालै नष्ट गरिएको साहले जानकारी दिए । यी होटलहरू जनकपुरको मुख्य पर्यटकीय क्षेत्र जानकी मन्दिर आसपासका शाकाहारी होटलहरू हुन् ।
मुख्यमन्त्री सिंहले जनकपुरका होटलहरूमा सफा, स्वस्थ र स्वच्छ खाना नपाइने गुनासो बढेपछि अनुगमन थालेको बताए । सुरक्षित तथा स्वच्छ खाद्य उत्पादन, वितरण र उपभोगमा उपभोक्ताको अधिकार सुनिश्चित गर्नका लागि अनुगमन थालिएको उनले बताए ।
अनुगमनका क्रममा होटलहरूको भान्सा कोठा अव्यवस्थित र मापदण्ड विपरीत फोहोर अवस्थामा रहेको पाइएको छ । प्रमुख सन्तोष साहका अनुसार कतिपय होटलमा खुला ठाउँमा खाद्य सामग्री थुपारिएको र म्याद गुज्रिएका वस्तु प्रयोग गरिएको पाइएको छ ।
टोलीले होटल सञ्चालकहरूलाई फोहोर व्यवस्थापनमा ध्यान दिन, स्वच्छता कायम राख्न र म्याद गुज्रेका सामग्री प्रयोग नगर्न चेतावनी दिएको छ । मुख्यमन्त्री सिंहले अनुगमनलाई नियमित बनाउँदै होटल व्यवसायीलाई थप जिम्मेवार र उत्तरदायी बनाउन सरकारले कडा कदम चाल्ने बताए । “स्वास्थ्यसँग प्रत्यक्ष सम्बन्धित विषय भएकाले होटल तथा रेस्टुरेन्टहरूको अनुगमनलाई कडाइका साथ निरन्तरता दिन सम्बन्धित निकायलाई उनले निर्देशन समेत दिएका छन् ।
जनकपुरधाम मधेश प्रदेशको प्रमुख पर्यटकीय गन्तव्यसमेत भएकाले यहाँको खानपिन व्यवस्थित र सुरक्षित बनाउन प्रदेश सरकारले चासो देखाएको देखिन्छ ।
-1729995576.jpeg)
