जिल्ला परीक्षा समन्वय समिति पर्साको बैठकले माध्यमिक शिक्षा परीक्षा (SEE) अन्तर्गत वीरगंज महानगरपालिकाको सुरजी देवी माध्यमिक विद्यालयमा अमर्यादित काम गरेका केन्द्राध्यक्ष सहितका निरीक्षकहरूलाइ कार्वाही गरेको छ ।
बैठकमा प्रमुख जिल्ला अधिकारी (प्रजिअ) गणेश अर्यालले अनुगमनका क्रममा देखिएका अनियमितताका विषयमा समीक्षा गर्दै सुरजी देवी माध्यमिक विद्यालयकाे परीक्षामा लापरवाही, अनियमितता र उच्छृङ्खल गतिविधि देखिएपछि त्यहाँ खटिएका केन्द्राध्यक्ष नन्दकिशोर राम, सहायक केन्द्राध्यक्षहरू सबिता चौधरी र चन्द्रशेखर झा तथा केन्द्रका सबै निरीक्षकहरूलाई जिम्मेवारीबाट मुक्त गर्ने निर्णय गरेका छन् ।
यसअघि उक्त केन्द्रमा अनुगमनका क्रममा उत्तरपुस्तिका आदानप्रदान, परीक्षार्थीलाई अन्य व्यक्तिबाट सहयोग गराइएको, कक्षाको अनुशासन फितलो बनाइएको र व्यवस्थापन लापरवाही गरिएको पाइएको थियो । साेहि गतिविधिका कारण परीक्षाको पारदर्शितामा गम्भीर प्रश्न उठेकोले तुरुन्तै कार्वाही गरिएकाे जनाइएको छ ।
बैठकले सुरजी देवी विद्यालयको परीक्षा केन्द्र व्यवस्थापन सुधारका लागि वैकल्पिक सूचीमा रहेका ब्रजमोहन प्रसाद कानुलाई केन्द्राध्यक्षको जिम्मेवारी प्रदान गर्ने निर्णय गरेको छ । कानु नेपाल राष्ट्रिय माध्यमिक विद्यालय श्रीपुर, वीरगंजका पूर्व केन्द्राध्यक्ष समेत हुन् । उनमा परीक्षाको अनुशासन कायम राख्न सक्ने जिम्मेवारी रहेकाले साे अवसर दिएकाे जनाएकाे छ ।
उक्त केन्द्रमा अनियमितता तथा उच्छृङ्खल गतिविधिमा संलग्न एक परीक्षार्थीलाई पनि निष्कासन गर्ने बैठकले निर्णय गरेकाे छ । सिम्बल नं. 03702456D का परीक्षार्थीलाई यो वर्षको SEE परीक्षाबाट निष्काशन गरी भविष्यमा परीक्षाको नियम र अनुशासनको पालना गराउन यस्ताे कडा कदम चालेकाे पर्साका प्रमुख जिल्ला अधिकारी गणेश अर्यालले बताए ।
यसैगरी बैठकले नेपाल राष्ट्रिय विद्यापीठ माध्यमिक विद्यालय श्रीपुरमा पनि केन्द्राध्यक्षको लापरवाही र संदेहास्पद गतिविधि पाइएकोले केन्द्राध्यक्षलाई सचेत गराइएको छ । आगामी परीक्षाहरूमा यो केन्द्रमा विशेष निगरानी राख्ने गरी सचेत गराएकाे बैठकले निर्णय गरेको जनाएकाे छ ।
प्रमुख जिल्ला अधिकारी गणेश अर्यालका अनुसार परीक्षामा देखिएका अनियमितताका घटनाहरूमा कडाइका साथ निगरानी गरिदै छ । SEE परीक्षाको मार्यादा, पारदर्शिता र अनुशासन कायमका लागि सबैले साैहार्दपुर्ण वातावरण बनाउनु पर्ने उनले बताए ।
जिल्ला परीक्षा समन्वय समितिले सबै परीक्षा केन्द्रहरूमा अनुगमनलाई थप कडाइ गर्ने निर्णय समेत गरेको छ । अनियमितता हुने केन्द्रहरूमा कडा कारबाही गर्ने चेतावनी समेत दिइएको छ ।
सम्बन्धीत भिडियाे
-1729995576.jpeg)
