नेपाल विद्युत प्राधिकरणका कार्यकारी निर्देशक कुलमान घिसिङलाई पदबाट बर्खास्त गरिएको छ ।
सोमबार बसेको मन्त्रिपरिषद् बैठकले घिसिङलाई बर्खास्त गर्ने निर्णय गर्दै हितेन्द्र देव शाक्यलाई नयाँ कार्यकारी निर्देशकमा नियुक्त गरेको छ ।
उर्जा मन्त्री दीपक खड्काले कुलमान घिसिङको कामप्रति असन्तुष्टि जनाउँदै उनलाई पदमुक्त गर्ने प्रस्ताव मन्त्रिपरिषद् बैठकमा पेश गरेका थिए । उक्त प्रस्ताव पारित भएसँगै कुलमानको कार्यकाल अन्त्य भएको हो । कुलमान घिसिङ २०७८ साल साउन २५ गते दोस्रो कार्यकालका लागि कार्यकारी निर्देशकमा नियुक्त भएका थिए । तर, उनको कार्यकाल सकिनु केही दिन अगावै सरकारले उनलाई हटाउने निर्णय लिएको छ ।
कुलमान घिसिङ र सरकारबीच पछिल्लो समय सम्बन्ध बिग्रँदै गएको थियो । विशेषगरी डेडिकेटेड र ट्रंक लाइनको विवादले यी दुबै पक्षबीच दूरी थप बढाएको थियो । नेपाल विद्युत् प्राधिकरणले उद्योगीहरूले तिर्न बाँकी बक्यौता महसुल नतिरेको भन्दै डेडिकेटेड र ट्रंक लाइन काट्ने निर्णय गरेको थियो । तर, केपी शर्मा ओली नेतृत्वको सरकारले उद्योगीहरूको लाइन पुनः जोड्न निर्देशन दिएको थियो, जसले कुलमान र सरकारबीच टकराव निम्त्याएको थियो ।
घिसिङले बक्यौता नतिर्ने उद्योगीहरूलाई छुट दिन नमिल्ने भन्दै आर्थिक अनुशासन कायम गर्न कडा कदम चालेका थिए । तर, सरकारले उद्योगीहरूलाई सहुलियत दिनुपर्ने पक्षमा रहेपछि यो विषय तनावको मुख्य कारण बनेको हो ।
हितेन्द्र देव शाक्य प्राधिकरणको नयाँ नेतृत्वमा
कुलमान घिसिङलाई बर्खास्त गरेसँगै सरकारले प्राधिकरणको कार्यकारी निर्देशकमा हितेन्द्र देव शाक्यलाई नियुक्त गरेको छ । सोमबारको मन्त्रिपरिषद् बैठकले शाक्यलाई जिम्मेवारी दिने निर्णय गरेको हो । शाक्य यसअघि पनि प्राधिकरणका उच्च पदमा कार्यरत थिए र ऊर्जा क्षेत्रको अनुभव भएका व्यक्ति हुन् ।
सरकारले कुलमान घिसिङलाई हटाउने निर्णय गर्दा नागरिक तहमा भने असन्तोष देखिएको छ । सामाजिक सञ्जालमा कुलमानलाई हटाइएको विषयलाई लिएर विरोध सुरु भएको छ । कुलमानले पहिलो कार्यकालमा लोडसेडिङ अन्त्य गरी ‘लाइटम्यान’का रूपमा प्रशंसा बटुलेका थिए । तर, पछिल्लो समय सरकारसँगको असमझदारीले उनको पद गुमेको कतिपयकाे बुभइ छ ।
कुलमान घिसिङको लोकप्रियताका कारण सरकारलाई केही समयसम्म उनलाई हटाउने निर्णय लिन कठिनाइ भएको थियो । जनस्तरबाट चर्को दबाब परेपछि यसअघि सरकार पछि हटे पनि सोमबारको बैठकमा भने उर्जा मन्त्री दीपक खड्काको प्रस्तावमा अन्ततः कुलमानलाई हटाइएको हो ।
कुलमान घिसिङलाई हटाइएपछि उनको आगामी भूमिकाबारे चासो बढेको छ । के उनी राजनीतिक रूपमा सक्रिय हुनेछन् वा निजी क्षेत्रमा योगदान दिनेछन् भन्ने विषयमा पनि चर्चा सुरु भएको छ ।
-1729995576.jpeg)
