वीरगञ्ज सुक्खा बन्दरगाह भन्सार कार्यालयले चालु आर्थिक वर्षको आठ महिनामा रु ३२ अर्ब ३२ करोड ८८ लाख ७८ हजार राजस्व सङ्कलन गरेको छ ।
भन्सार विभागले चालु आर्थिक वर्ष २०८१/०८२ का लागी कार्यालयलाई दिएको ६० अर्ब चार करोड ८७ लाख ९७ हजार राजस्व सङ्कलन गर्ने लक्ष्य अनुसार पछिल्ला दुई महिनामा मासिक लक्ष्यको ९२ प्रतिशतसम्म राजस्व सङ्कलन गरेको जनाएको छ ।
कार्यालयले गत साउनमा रु तीन अर्ब ७५ करोड, भदौमा रु चार अर्ब ६४ करोड राजस्व सङ्कलन गरेको थियो । असोजमा रु चार अर्ब ३६ करोड, कात्तिकमा रु तीन अर्ब ७९ करोड राजस्व सङ्कलन गरेको थियो ।
यसैगरी, गत मङ्सिरमा तीन अर्ब २२ करोड, पुसमा तीन अर्ब ५६ करोड, माघमा रु चार अर्ब २९ करोड र फागुनमा चार अर्ब ६८ करोड राजस्व सङ्कलन गरेको हो । चालु आवको आठ महिनामध्ये सबैभन्दा धेरै फागुन महिनामा राजस्व सङ्कलन भएको वीरगञ्ज सुक्खा बन्दरगाह भन्सार कार्यालयले जनाएको छ ।
यस कार्यालयमा राजस्व सङ्कलनका लागी सबैभन्दा बढी पेट्रोलियम पदार्थ, मोटर पार्ट्स, गाडी, फलफूल, औषधि, इलेक्ट्रोनिक सामान र औद्योगिक कच्चा पदार्थबाट हुने गर्दछ ।
वीरगञ्ज सुक्खा बन्दरगाह भन्सार कार्यालय नेपालको व्यापारिक प्रवेशद्वारका रूपमा रहेकोले यहाँको राजस्व सङ्कलनलाई मुलुकको आर्थिक स्थायित्वसँग जोडिन्छ । यद्यपि, कर्मचारी प्रशासनमा पारदर्शिता र नीतिगत सुधार तस्करी नियन्त्रण नभएकाले विभागले दिने गरेको लक्ष्य पूरा गर्न सकेको छैन् ।
-1729995576.jpeg)
