हेटौँडा । लामो समयदेखि बन्द रहेको हेटौँडा सिमेन्ट उद्योगले यही चैतको तेस्रो सातादेखि पुनः उत्पादन सुरु गर्ने भएको छ । उद्योगका मेसिन मर्मत सम्भार पूरा भइसकेको, कच्चा पदार्थ सुनिश्चितता भएको र कर्मचारीहरू काममा फर्किन सहमत भएपछि उत्पादन पुनः सुरु गर्न लागिएको हो ।
उद्योगका निमित्त महाप्रबन्धक इञ्जिनियर नविनकुमार कर्णका अनुसार स्थापना कालदेखि प्रयोग भइरहेको पुरानो मेसिन मर्मत गरिएको छ । आर्थिक समस्याका कारण नयाँ मेसिन जडान सम्भव नभएकाले तत्कालका लागि पुरानै मेसिन मर्मत गरेर उत्पादन अघि बढाइने उनको भनाइ छ । उद्योग सञ्चालनका लागि आवश्यक कच्चा पदार्थ मौज्दात रहेको र थप आपूर्ति निश्चित भइसकेको निमित्त महाप्रबन्धक कर्णले जानकारी दिए ।
‘अहिले करिब १०० टन कोइला मौज्दात छ, थप कोइला पनि भोलिदेखि आउने निश्चित भएको छ,’ उनले भने, ‘यसकारण कच्चा पदार्थको समस्या हुने छैन ।’ कोइलाको भुक्तानी सम्बन्धी समस्या भए पनि आपूर्तिकर्तासँग सहमति जुटेको उनले बताए ।
त्यस्तै, उद्योग सञ्चालनका लागि आवश्यक विद्युत् आपूर्तिको विषयमा नेपाल विद्युत् प्राधिकरणसँग छलफल भइसकेको छ । ‘विद्युत् आपूर्ति नियमित गर्न प्राधिकरणले प्रतिबद्धता जनाएको छ,’ कर्णले भने, ‘अब उद्योग सञ्चालनमा कुनै अवरोध रहँदैन ।’
गत असोज १५ देखि उद्योग बन्द हुँदा कर्मचारीहरूले तीन महिनादेखि तलब भत्ता पाउन सकेका छैनन्। उत्पादन पुनः सुरु भएपछि कर्मचारीलाई तलब भुक्तानी गर्ने तयारी गरिएको उद्योग प्रशासनले जनाएको छ ।
वि.सं. २०३३ मा स्थापना भएको हेटौँडा सिमेन्ट उद्योगले २०४३ सालदेखि सिमेन्ट उत्पादन सुरु गरेको थियो । आर्थिक संकटलगायतका कारण पटक–पटक बन्द हुँदै आएको उद्योगले गत भदौ महिनाको तेस्रो साताबाट पुनः उत्पादन सुरु गरेको थियो । तर, मेसिन मर्मत गर्नुपर्ने भएकाले असोज १५ देखि उत्पादन रोकिएको थियो ।हाल दैनिक १६ हजार बोरा सिमेन्ट उत्पादन क्षमता रहेको उद्योग आर्थिक समस्यालगायतका कारण कमजोर बनेको छ। उद्योग प्रशासनले उत्पादनलाई दीर्घकालीन रूपमा निरन्तरता दिन सरकारी सहयोग आवश्यक रहेको बताएको छ ।
-1729995576.jpeg)
