काठमाडौं । नेकपा माओवादी केन्द्रले नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउने सरकारको निर्णय बदनियतपूर्ण र आपत्तिजनक भएको जनाएको छ ।
पार्टीका उपाध्यक्ष अग्निप्रसाद सापकोटाले सोमबार विज्ञप्ति जारी गर्दै सरकारको यो कदम कुशासनको दृष्टान्त भएको आरोप लगाए ।
‘बिचौलिया र दलालहरूको स्वार्थमा गरिएको यो निर्णय कुशासनको पछिल्लो दृष्टान्त हो,’ विज्ञप्तिमा भनिएको छ, ‘इमान र निष्ठाका साथ काम गर्ने कुशल प्रशासकमाथि मनोवैज्ञानिक त्रास सिर्जना गर्न खोजिएको छ ।’
माओवादी केन्द्रले कुलमान घिसिङ हटाउने निर्णय तत्काल फिर्ता लिन सरकारसँग माग गरेको छ ।
‘यस प्रकारको अन्यायपूर्ण र अपमानजनक निर्णय तत्काल फिर्ता लिन हाम्रो पार्टी जोडदार माग गर्दछ,’ माओवादीको विज्ञप्तिमा उल्लेख छ ।
त्यस्तै, माओवादीले कुलमान हटाउने निर्णयसँगै नियोजित दुष्प्रचार थालिएको आरोपसमेत लगाएको छ ।
‘बेपत्ता पारिएका व्यक्तिको छानबिन र सत्य निरुपण तथा मेलमिलाप आयोग गठन गर्ने सहमतिसँग जोडेर हाम्रो पार्टी अध्यक्षप्रति गरिएको दुष्प्रचारलाई हामी खारेज गर्दछौं,’ विज्ञप्तिमा उल्लेख छ ।
-1729995576.jpeg)
