काठमाडौं | काठमाडौंको बूढानीलकण्ठस्थित भाडाको घरबाट अनलाइन सट्टाबाजी तथा क्रिप्टोकरेन्सी कारोबारमा संलग्न ११ जना भारतीय नागरिक पक्राउ परेका छन् ।
महानगरीय अपराध अनुसन्धान महाशाखाका अनुसार, पक्राउ परेकाहरूले अनलाइन जुवामार्फत २ अर्ब रुपैयाँभन्दा बढीको सट्टाबाजी सञ्चालन गरेका थिए। साथै, प्रारम्भिक अनुसन्धानमा उनीहरूले ९६ लाख ३३ हजार रुपैयाँभन्दा बढीको क्रिप्टोकरेन्सी कारोबार गरेको खुलेको छ ।
प्रहरीले मंगलबार साँझ ५:१५ बजे बूढानीलकण्ठ-३, देउला टोलस्थित भाडामा लिएको घरमा छापा मार्दा उनीहरूलाई अनलाइन सट्टाबाजी सञ्चालन गरिरहेको अवस्थामा नियन्त्रणमा लिएको हो ।
जिल्ला प्रहरी परिसरका एसपी अपिल बोहोराका अनुसार पक्राउ परेकाहरू इन्डियन प्रिमियर लिग (आइपीएल) क्रिकेट लगायत विभिन्न खेलहरूमा सट्टाबाजी सञ्चालन गर्दै आएका थिए । छापामारीका क्रममा प्रहरीले ३४ वटा मोबाइल फोन, ५ वटा ल्यापटप, ४ वटा हिसाब किताब अभिलेख रहेको नोटबुक, १४ वटा भारतीय बैंक खाताका चेकबुक, २७ वटा भारतीय एटीएम कार्ड र ४० वटा भारतीय सिमकार्ड बरामद गरेको छ ।
पक्राउ पर्नेहरूमा जयपुरका २४ वर्षीय सनी मिणा, आलुवाका २५ वर्षीय मोहित वर्मा, शिक्करका २६ वर्षीय पिउस भारद्वाज, जयपुरकै २५ वर्षीय हरकेश डडैया, २२ वर्षीय निशांत भारद्वाज, २३ वर्षीय आकाश वर्मा, १९ वर्षीय अंकित कुमार सैनी, २३ वर्षीय सन्जु शाकला, २८ वर्षीय रामसिंह जाठ, १९ वर्षीय लोकेश कुमार र १९ वर्षीय विकाश कुमार रहेका छन् ।
महानगरीय अपराध अनुसन्धान महाशाखाले पक्राउ परेकाहरूविरुद्ध काठमाडौं जिल्ला अदालतबाट सात दिनको म्याद थप अनुमति लिई अनुसन्धान गरिरहेको जनाएको छ ।
प्रहरीले गिरोहका अन्य सदस्यहरूबारे पनि अनुसन्धान जारी राखेको छ ।
-1729995576.jpeg)
