जीतपुरसिमरा उपमहानगरपालिकाले कृषिमा नयाँ युगको सुरुवात गर्दै किसानको सिँचाइलाई सहज बनाउन कृषि विद्युत मिटर जडान गर्ने र त्यसबाट उठ्ने बिजुली महसुल पनि नगरपालिकाले नै तिर्ने निर्णय गरेको छ ।
नगर प्रमुख राजन पौडेलको अध्यक्षतामा बसेको बैठकले वडा नं. १७, १८, १९, २०, र २४ का कृषियोग्य जमिनमा सिँचाइका लागि कृषि विद्युत मिटर जडान गर्न र सो मिटरमा आउने रकम उपमहानगरपालिकाले तिर्ने निर्णय गरेको हो । नगर प्रमुख पौडेलका अनुसार नेपाल विद्युत प्राधिकरण र कलैया वितरण केन्द्रको सहकार्यमा किसानको खेतसम्म कृषि विद्युत लाइन विस्तार भइसकेको छ ।
यस कदमले किसानलाई भरपर्दो बिजुलीमार्फत सिँचाइको सुविधा प्रदान गरी कृषि उत्पादनमा गुणात्मक सुधार ल्याउने अपेक्षा गरिएको छ । साथै, बिजुली सुविधाले आधुनिक कृषि प्रविधि अपनाउन मद्दत पुग्ने विश्वास पनि व्यक्त गरिएको छ ।
किसानमा हर्ष र आशंका दुवै
नगरपालिकाको यो निर्णयले किसानहरू उत्साहित भएका छन् । तथापि, यसअघि पनि उपमहानगरपालिकाले कृषि मिटरको महसुल तिर्ने घोषणा गरेको तर कार्यान्वयन नगरेको उदाहरणका कारण यो निर्णयको कार्यान्वयन हुनेमा केही किसानहरू आशंकित छन् । जीतपुरसिमरा उपमहानगरपालिका वडा नं. १७ का निवर्तमान वडाअध्यक्ष नवराज बहादुर खड्काका अनुसार, महत्वपूर्ण निर्णयहरू गर्ने तर कार्यान्वयनमा चासो नदिने प्रवृत्तिका कारण यो निर्णय पनि कार्यान्वयन हुने झिनो आशा मात्र रहेको बताए ।
तर, नगर प्रमुख पौडेलले भने यसपटक यो कार्यक्रम पूर्णरूपमा कार्यान्वयन हुने र किसानको हितलाई प्राथमिकतामा राख्दै नगरपालिकाले किसानको उत्पादन र जीवनस्तर सुधार गर्न प्रतिबद्ध रहेको दोहोर्याएका छन् ।
-1729995576.jpeg)
