जनकपुरधामस्थित अस्पताल रोडमा रहेका ९ वटा होटलको अनुगमन गरिएको छ ।
होटलका खानेकुरा स्वस्थ, स्वच्छ र सुरक्षित बनाउँदै होटल अनुगमन तथा नियमनलाई थप कडाइ गर्न मधेश प्रदेशका मुख्यमन्त्री सतिशकुमार सिंहले निर्देशन दिएपछि अनुगमनलाई तीव्रता दिइएको हो । संयुक्त टोलीमा खाद्य प्रविधि तथा गुण नियन्त्रण कार्यालय, घरेलु तथा साना उद्योग कार्यालय, जनकपुरधाम र जनकपुर उद्योग वाणिज्य संघका अधिकारी र प्रतिनिधि रहेका थिए ।
अनुगमनका क्रममा दर्ता बिना सञ्चालनमा रहेका पाँच होटललाई अनिवार्य रूपमा दर्ता गर्न निर्देशन दिइएको छ । दर्ता गर्न निर्देशन दिइएका होटलहरूमा शिव भोजनालय, किशोरी भोजनालय, कृष मिठाइ पसल, रामईश्वर होटल र बैष्णव भोजनालय रहेका छन् ।
अनुगमनका क्रममा होटलहरूमा म्याद गुज्रिएका सामग्री र अखाद्य वस्तु भेटिएपछि ती सामग्री तत्काल नष्ट गरिएको छ । म्याद गुज्रिएका पेय पदार्थ ड्यु, स्लाइस, मिरिन्डा, सेभन अप, बिग्रेका मिठाइ, अखाद्य तेल र डाल्डा अनुगमन टोलीले नष्ट गरेको साना उद्योग तथा घरेलु कार्यालय जनकपुरधामका प्रमुख सन्तोष साहले जानकारी दिए ।
त्यस्तै, भान्साघरको सरसफाइमा सुधार गर्न, अखाद्य सामग्रीको बिक्री नगर्न, ग्राहकसँग शिष्ट व्यवहार गर्न र स्वास्थ्य मापदण्ड पालनामा कडाइ गर्न होटल सञ्चालकलाई निर्देशन दिइएको छ । अस्पताल क्षेत्रका होटलहरूमा बिरामी तथा सेवाग्राहीको चाप धेरै हुने भएकाले उनीहरूको स्वास्थ्यलाई ध्यानमा राखेर अनुगमनलाई निरन्तरता दिइने जनाएको छ ।
अनुगमन टोलीले आगामी दिनमा जनकपुरधामका अन्य होटल र पसलहरूमा पनि यस्तै अनुगमनलाई निरन्तरता दिने योजना बनाएको छ ।
-1729995576.jpeg)
