पर्सामा नशालु पदार्थ खुवाई किशोरीमाथि पटक–पटक बलात्कार गरी गर्भ बोकाएको आरोपमा पक्राउ परेका ५२ वर्षीय शेख महमद अनवर विरुद्ध जिल्ला अदालत पर्साले पाँचदिन म्याद थप गरी अनुसन्धान गर्न आदेश दिएको छ ।
वीरगंज महानगरपालिका वडा नम्बर ३१ इस्लामपुर घर भई वडा नम्बर १३ मुर्लीमा बस्दै आएका शेख अब्दुल मतिनका छोरा शेख महमद अनवरलाई पर्सा प्रहरीले बुधबार नियन्त्रणमा लिएको थियो । पीडित किशोरीले दिएको उजुरीका आधारमा उनलाई पक्राउ गरिएको पर्साका प्रहरी उपरीक्षक (एसपी) गौतम मिश्रले जानकारी दिए ।
पीडित किशोरीले प्रहरीलाई दिएको बयान अनुसार आरोपीले किशोरीलाई विभिन्न नशालु पदार्थ मिसाइएको पानी खुवाएर मानसिक रुपमा कमजोर बनाएर पटक–पटक बलात्कार गरेका थिए ।
आफू डककी छोरीकी साथी भएकोले पढ्न जाँदा यस्तो अमानवीय व्यवहारको सिकार भएको पिडितले जाहेरीमा उल्लेख गरेकी छिन् । किशोरीका अनुसार, पीडकले आफूलाई ज्यान मार्ने धम्की दिने गरेको र घटना बाहिर ल्याए बेइज्जत गराइदिने धम्की दिँदै नियमित रूपमा यौन शोषण गर्ने गरेका बयान दिएकी छिन् ।
पीडित किशोरीको मेडिकल परीक्षणबाट १० हप्ताको गर्भ रहेको पुष्टि भएको छ । किशोरीले लामो समयदेखि नशालु पदार्थ खुवाई जबरजस्ती करणी गरेको प्रहरी समक्ष बयान दिएकि छन् ।
घटना बाहिरिएपछि प्रहरीले तत्काल अनुसन्धान सुरु गरी अनवरलाइ पक्राउ गरेको थियो । प्रहरीले पीडित किशोरीलाई तत्काल संरक्षणमा राख्दै उनको स्वास्थ्य परीक्षणपछि आवश्यक कानूनी तथा मानसिक परामर्श प्रदान गरिरहेको जनाएको छ ।
पर्सा प्रहरीले आरोपी विरुद्ध जबरजस्ती करणीको मुद्दामा पर्सा जिल्ला अदालतबाट म्याद थप गरी अनुसन्धान थालिएको जनाइएको छ ।
-1729995576.jpeg)
