वीरगञ्जस्थित ठाकुरराम बहुमुखी क्याम्पसमा सम्पन्न स्वतन्त्र विद्यार्थी युनियन (स्ववियु) चुनावमा नेपाली काङ्ग्रेसको छाता सङ्गठन नेविसंघले पराजय बेहोर्नुको मुख्य कारण कांग्रेसभित्रको असन्तोष, ठेकेदारी शैली र गुटबन्दी रहेको नेपाली कांग्रेसका युवा नेता कञ्चन झाले टिप्पणी गरेका छन् ।
सामाजिक सञ्जालमार्फत पराजय प्रति पार्टी नेतृत्व र कार्यशैलीप्रति असन्तोष व्यक्त गर्दै उनले ठेकेदारी शैली र गुटबन्दीले नेविसंघलाई कमजोर बनाएको र यसै कारण क्याम्पसमा पार्टी समर्थित उम्मेदवारहरू चुनावी मैदानमा पिछडिएको बताएका छन् ।
चुनावी परिणामले ठाकुरराम क्याम्पसमा नेविसङ्घलाई विद्यार्थीहरूले समर्थन नगरेको स्पष्ट देखाएको उनको भनाई छ । जिल्ला हाक्ने नेतृत्वहरुकै कारण हाम्रै नेविसंघकै आधा दर्जनभन्दा बढी सदस्यहरूले विद्रोह गर्दै स्वतन्त्र उम्मेदवारको रूपमा चुनाव लड्नुपर्ने परिस्थिति पार्टी नेतृत्वको गलत रणनीतिको परिणाम भएको बताएका छन् । उनका अनुसार, चुनावी प्रक्रिया र उम्मेदवार छनोटको चुकका कारण क्याम्पसमा नेविसङ्घ हार व्यहोर्ने बाध्य भएको हो ।
युवा नेता झाले सामाजिक सञ्जालमा लेखेका छन् “संगठनको सामर्थ्य समझ भएका र विद्यार्थी राजनीतिको वस्तुस्थिति बुझेका युवा-विद्यार्थीलाई पाखा लगाएर ‘मेरा बाले घ्यू खा थिए, हात सुँघ् सुँघ् !’ भन्ने शैलीमा चुनावका लागि जब पेटी ठेकेदारहरूलाई पर्सा कांग्रेसले हर्ताकर्ता बनायो, तबदेखि नै नेविसंघ छिन्नभिन्न हुन थालिसकेको थियो । जुनकुरा ठाकुरराममा नेविसंघकै आधा दर्जन सदस्यले फरक समूह/स्वतन्त्रबाट उम्मेदवारी दिएबाट खुलारूपमा देखियो। जसलाई पर्सा कांग्रेसको आन्तरिक झगडामा महारथ प्राप्त गरेकाहरूले त झनै कित्ताकाट नै गरिदिए! यति हुँदाहुँदै पर्सा कांग्रेसले नहार्ने र नेविसंघले जित्ने भन्ने पनि कहिँ सम्भव हुन्छ त ?
पहिले जे नहुनुपर्ने थियो त्यही भयो र पछि जे हुनुथियो त्यही भयो! अर्थात्, कतै चुनावी रणनीतिमा त कतै उम्मेदवार चयनमा चुक भयो, नेपाली कांग्रेस पर्साको हार भयो, नेविसंघबाटै विद्रोह गरेका राजकुमार ठाकुररामको स्ववियु नेतृत्वमा विजयी भए। नर्सिंङ क्याम्पसको नेतृत्व पनि नेविसंघको हातबाट गुम्यो। गर्न त नगर्ला तर पनि भन्छु- पर्सा कांग्रेसले स्ववियुमा भएको आफ्नो हारको समीक्षा गरोस् । जय नेपाल !”
युवा नेता झाले पार्टी नेतृत्वले हारको गम्भीर समीक्षा नगरे काङ्ग्रेसलाई आगामी दिनमा थप चुनौतीहरू आउन सक्ने चेतावनी दिएका छन् । अब आउने कुनैपनि चुनावमा ठेकेदारी शैलीको अन्त्य र सही नेतृत्व विकास गर्न नसकेसम्म काङ्ग्रेस पार्टीभित्रको आन्तरिक विवाद थप चर्कन सक्ने बताएका छन् ।
क्याम्पसको स्ववियु चुनावमा पराजयपछि स्थानीय स्तरमा काङ्ग्रेसको विद्यार्थी सङ्गठनलाई पुनर्संयोजन र नेतृत्व चयनमा नयाँ सोच आवश्यक भएको झाको बुझाइ छ ।
-1729995576.jpeg)
