बाराको बारागढी गाउँपालिकाको आर्थिक वर्ष २०८१/८२ को हिउँदे गाउँसभा बिहीबार सम्पन्न भएको छ ।
गाउँपालिका अध्यक्ष अशोक कुमार जयसवालको अध्यक्षतामा बसेको गाउँसभामा आगामी विकास योजना, नीति निर्माण र बजेट कार्यान्वयनका विषयमा छलफल भएको हो ।
गाउँसभालाई सम्बोधन गर्दै अध्यक्ष जयसवालले गाउँपालिकाको समग्र विकासका लागि सबै जनप्रतिनिधि र कर्मचारीहरूको सहकार्य अनिवार्य रहेको बताए। उनले एक्लैले विकास सम्भव नहुने भन्दै उपाध्यक्ष, कार्यपालिका सदस्य, वडा अध्यक्ष, वडा सदस्य र कर्मचारीहरूले विकासका योजनामा हातेमालो गर्नुपर्ने धारणा राखे ।
जयसवालले आफ्नो कार्यकालमा सिङ्गो गाउँपालिकालाई धुवाँमुक्त बनाएको दाबी गर्दै शिक्षा, स्वास्थ्य र पूर्वाधारमा पनि उल्लेखनीय प्रगति भएको बताए ।
जनप्रतिनिधिहरूलाई स्थानीय सञ्चालन ऐन २०७४ अध्ययन गरी कर्तव्य र अधिकारको सही प्रयोग गर्न सुझाव दिँदै उनले बाँकी दुई वर्षमा बारागढी गाउँपालिकालाई नमुना बनाउने अठोट व्यक्त गरे । गाउँसभामा उपाध्यक्ष लक्ष्मी देवी रायसहित वडा अध्यक्ष, वडा सदस्य र कार्यपालिका सदस्यहरूले शुभकामना मन्तव्य राखेका थिए ।
गाउँपालिकाका लेखा अधिकृत अजय चौधरीले जनप्रतिनिधिहरूले बनाएको नीति र नियमलाई कर्मचारीहरूले कार्यान्वयन गर्ने प्रतिबद्धता जनाएका थिए ।
कर्मचारीहरूले गाउँसभाबाट पारित नीति र बजेटलाई पालिकाको कामकाजमा लागू गरी समर्पित रूपमा काम गरिरहेको धारणा राखे ।
-1729995576.jpeg)
