काठमाडौंको तीनकुनेमा भएको राजावादी प्रदर्शन उग्र बनेपछि एक प्रदर्शनकारीको मृत्यु भएको छ ।
प्रहरीको गोली लागी घाइते भएका काठमाडौँ किर्तिपुरका सविन महर्जनको शिक्षण अस्पतालमा उपचारको क्रममा मृत्यु भएको हो । अस्पतालका निर्देशक प्राडा सुवास आचार्यका अनुसार प्रदर्शन स्थलबाट घाइते अवस्थामा ल्याइपुर्याउँदा नै महर्जनको मृत्यु भइसकेको थियो । शव पोस्टमार्टमका लागि फरेन्सिक विभागमा पठाइएको छ ।
प्रदर्शन हिंसात्मक बन्दै गएपछि जिल्ला प्रशासन कार्यालय, काठमाडौंले तीनकुने क्षेत्र र आसपासका क्षेत्रमा कर्फ्यू आदेश जारी गरेको छ ।
काठमाडौंका प्रमुख जिल्ला अधिकारी ऋषिराम तिवारीले अपराह्न ४ः२५ देखि राति १० बजेसम्म कर्फ्यू आदेश लागू गरिएको जानकारी दिएका छन् । कर्फ्यू आदेश अनुसार बानेश्वर–तीनकुने क्षेत्र, गौशाला–विमानस्थल–गैरीधारा–तीनकुने हुँदै कोटेश्वरसम्म, कोटेश्वरदेखि जडीबुटी पुलसम्म, कोटेश्वरदेखि बालकुमारी पुलसम्म, बानेश्वर चोकदेखि शङ्खमुल पुलसम्म र पुरानो बानेश्वरदेखि नयाँ बानेश्वर चोकसम्म कुनै पनि प्रकारका भेला, जुलुस, प्रदर्शन, सभा, र घेराउ गर्न प्रतिबन्ध लगाइएको छ ।
प्रदर्शनका क्रममा कोटेश्वरको भाटभटेनी नजिकै एक किशोरी गोली लागेर घाइते भएकी छन् । प्रत्यक्षदर्शीका अनुसार १५/१६ वर्षकी ती किशोरी घर फर्किने क्रममा गोली लागेकी हुन् । उनलाई खुट्टामुनि गोली लागेको छ भने उनीसँगै रहेका २०/२१ वर्षका युवकलाई गोलीको छर्रा लागेको छ।
उग्र प्रदर्शन, विमानस्थलमा उडान अवरुद्ध
त्रिभुवन अन्तर्राष्ट्रिय विमानस्थलनजिकै प्रदर्शनकारीले आगजनी गरेपछि विमानस्थलमा उडान पनि अवरुद्ध भएको छ । नागरिक उड्डयन प्राधिकरणको कार्यालयमा आगो लागेपछि विमानस्थलमा सुरक्षा खतरा देखाउँदै उडान स्थगित गरिएको हो । आगो विमानस्थल क्षेत्रभित्र पसेसँगै सुरक्षा संवेदनशीलता बढेको कारण विमानस्थल बन्द गरिएको उच्च स्रोतले जनाएको छ ।
प्रधानमन्त्रीले बोलाए मन्त्रिपरिषद्को आकस्मिक बैठक
विरोध प्रदर्शन नियन्त्रणभन्दा बाहिर जान थालेपछि प्रधानमन्त्री केपी शर्मा ओलीले मन्त्रिपरिषद्को आकस्मिक बैठक बोलाएका छन् । बैठक प्रधानमन्त्रीको सरकारी निवास बालुवाटारमा बस्ने तय गरिएको छ । बैठकमा राजावादी आन्दोलनका कारण उत्पन्न सुरक्षा संकट र त्यसबाट उत्पन्न परिस्थिति व्यवस्थापनबारे छलफल हुने बताइएको छ ।
नेपाली सेना गस्तीमा परिचालन
कर्फ्यू आदेश पालना गराउन नेपाली सेना तीनकुने क्षेत्रमा गस्तीमा खटिएको छ । सेना परिचालनपछि पनि प्रदर्शनकारीले निजी र सार्वजनिक सम्पत्तिमा तोडफोड र आगजनी जारी राखेपछि थप कडा सुरक्षा व्यवस्था मिलाइएको छ । राजावादी आन्दोलनको नेतृत्व राप्रपा नेता नवराज सुवेदीले गरेका थिए भने प्रदर्शनलाई जनपरिचालनको जिम्मेवारी मेडिकल व्यवसायी दुर्गा प्रसाईंलाई दिइएको थियो । तीनकुनेमा निर्धारित स्थानमा मात्र प्रदर्शन गर्न भनिएको भए पनि प्रसाईंले गाडी हुइँक्याएर नयाँ बानेश्वरतर्फ आउन खोजेपछि स्थिति तनावपूर्ण बनेको हो ।
यसक्रममा प्रदर्शनकारी र प्रहरीबीच झडप हुँदा सार्वजनिक सम्पत्ति र निर्माणाधीन संरचनामा तोडफोड र आगजनी भएको छ । प्रदर्शन हिंसात्मक बन्दै गएपछि नेपाली सेना, सशस्त्र प्रहरी र नेपाल प्रहरीका विशेष टोली गस्तीमा खटिएका छन् ।
-1729995576.jpeg)
