काठमाडौं । राष्ट्रिय मानव अधिकार आयोगले राजावादीहरुको प्रदर्शन हिंसात्मक भएको निष्कर्ष निकालेको छ । आयोगले एक विज्ञप्ति जारी गर्दै प्रहरीको घेरा तोड्दै प्रदर्शनकारी बानेश्वरतर्फ जान खोज्दा आन्दोलन हिंसात्मक बनेको जनाएको छ ।
शुक्रबार राजधानी काठमाडौंमा समाजवादी मोर्चा र राजावादीहरुको छुट्टाछुट्टै आमसभा आयोजना भएका थिए । आयोगले चारवटा उच्चस्तरीय टोली खटाई अनुगमन गरेको थियो, जसमा राजावादीको आन्दोलन हिंसात्मक देखिएको उल्लेख छ ।
आयोगका अनुसार प्रदर्शनकारी र सुरक्षाकर्मीबीच झडप हुँदा प्रहरीमाथि ढुंगा प्रहार भएको, व्यक्तिको घरमा ढुंगा हान्ने र आगजनी गर्ने घटना भएको छ । तीनकुने क्षेत्रमा सञ्चारमाध्यम, कलेज, निजी घर तथा दमकल र सशस्त्र प्रहरीको गाडीमाथि समेत आक्रमण गरिएको पाइएको आयोगले जनाएको छ ।
आन्दोलन नियन्त्रणका क्रममा प्रहरीले निजी आवास प्रयोग गरी अश्रुग्यास प्रहार गरेको, भीड नियन्त्रणका लागि पानीको फोहोरा र हवाई फायर गरेको पनि आयोगले उल्लेख गरेको छ ।
‘कुनै पनि बहानामा हिंसात्मक गतिविधि र अरूको अधिकार हनन गर्ने कार्य स्वीकार्य हुँदैन,’ आयोगले भनेको छ, ‘यस प्रकारका घटनामा संलग्नलाई कानूनी कारबाही गर्न नेपाल सरकारलाई आग्रह गरिन्छ ।’
आयोगले आगामी दिनमा प्रदर्शनलाई शान्तिपूर्ण बनाउन तथा अधिकार प्रयोग गर्दा अरूप्रति पर्ने असरलाई ध्यान दिन आन्दोलनरत पक्षलाई आग्रह गरेको छ ।
-1729995576.jpeg)
