नेपाल क्रिकेट संघ (क्यान) ले नेपाली राष्ट्रिय पुरुष क्रिकेट टोलीको मुख्य प्रशिक्षकका रूपमा अष्ट्रेलियन प्रशिक्षक स्टुअर्ट ललाई नियुक्त गरेको छ ।
स्टुअर्टले अब आगामी दुई वर्षसम्म नेपाली टोलीलाई प्रशिक्षण दिनेछन् । मुख्य प्रशिक्षकका लागि ७० जनाले आवेदन दिएका थिए । तीमध्ये सर्टलिस्ट र अन्तर्वार्ता प्रक्रियाबाट अनुभवी प्रशिक्षक स्टुअर्ट छनोट भएका हुन् ।
५६ वर्षीय स्टुअर्ट अष्ट्रेलियाका पूर्वक्रिकेटर हुन् । उनले सन् १९९४ देखि १९९९ सम्म अष्ट्रेलियाको राष्ट्रिय टोलीबाट एउटा टेष्ट र ५४ एकदिवसीय अन्तर्राष्ट्रिय (ओडिआई) खेल खेलेका थिए। क्रिकेटरका रूपमा लामो यात्रा तय गरेका स्टुअर्टले थुप्रै घरेलु लिग खेलिसकेका छन् ।
प्रशिक्षकका रूपमा पनि स्टुअर्टको अनुभव व्यापक छ । उनले सन् २०११ बाट श्रीलंकाको सहायक प्रशिक्षकको रूपमा आफ्नो प्रशिक्षण यात्रा सुरु गरेका थिए। त्यसपछि उनले वेस्टइन्डिज, बंगलादेश, अफगानिस्तान र अमेरिकामा मुख्य प्रशिक्षकका रूपमा कार्य अनुभव हासिल गरे ।
उनकै नेतृत्वमा अमेरिकाले सन् २०२४ को टी-२० विश्वकपमा उत्कृष्ट प्रदर्शन गर्दै सुपर-८ सम्मको यात्रा तय गरेको थियो। त्यसक्रममा अमेरिकाले पाकिस्तानलाई सुपर ओभरमा पराजित गर्दै महत्त्वपूर्ण जित हात पारेको थियो । यद्यपि, सन् २०२४ को अक्टोबरमा भएको आइसीसी विश्वकप लिग-२ अन्तर्गत स्कटल्याण्डसँग १० विकेटले पराजित भएपछि अमेरिकी क्रिकेट बोर्डले स्टुअर्टलाई मुख्य प्रशिक्षकको पदबाट हटाएको थियो। त्यसपछि उनी नेपाली टोलीको प्रशिक्षकका रूपमा नेपाल आएका हुन् ।
नवनियुक्त प्रशिक्षक स्टुअर्टलाई नेपाली टोलीलाई सुधार गर्दै आगामी चुनौतीपूर्ण प्रतियोगिताहरूमा उत्कृष्ट प्रदर्शन गराउनुपर्ने महत्त्वपूर्ण जिम्मेवारी दिइएको छ । नेपाली टोलीले हालसम्म आइसीसी विश्वकप लिग-२ अन्तर्गत १२ खेल खेलेको छ र तालिकामा पछाडिबाट दोस्रो स्थानमा रहेको छ । स्टुअर्टले टोलीको प्रदर्शन सुधार गर्दै आगामी टी-२० विश्वकपमा छनोट गर्ने मुख्य चुनौतीलाई सामना गर्नुपर्नेछ ।
-1729995576.jpeg)
