पत्रकार सुरेश रजकको योजनाबद्ध हत्यामा संलग्न व्यक्तिहरूलाई कडा कारबाहीको माग गर्दै नेपाल पत्रकार महासंघले आन्दोलनको घोषणा गरेको छ ।
महासंघको आकस्मिक केन्द्रीय समितिको बैठकले पत्रकारमाथिको आक्रमण, सञ्चार गृहमा भएको आगजनी, र तोडफोडको विरोधमा आन्दोलनका थप कार्यक्रम तय गरेको हो ।
महासंघका महासचिव रामप्रसाद दाहालका अनुसार, आइतबार कार्यस्थलमा कालोपट्टी बाँधेर विरोध प्रकट गर्ने, सोमबार केन्द्रीय समिति, प्रदेश समिति र शाखाहरूमार्फत नेपाल सरकारलाई ज्ञापनपत्र बुझाउने, र मंगलबार सरोकारवाला संघ–संस्थासँग छलफल गर्ने कार्यक्रम तय भएको छ । “आन्दोलनका थप कार्यक्रम अवस्थाको विश्लेषणपछि तय गरिनेछ,” महासचिव दाहालद्वारा जारी विज्ञप्तिमा उल्लेख छ ।
महासंघले क्षति पुगेका सञ्चार गृहको अनुगमन र घाइते पत्रकार तथा सञ्चार सामग्रीको विवरण संकलन गर्न उपाध्यक्ष उमिदप्रसाद बागचन्दको नेतृत्वमा एक समिति गठन गरेको छ । उक्त समितिमा सचिवहरू रमेश खतिवडा, सोनी शर्मा, प्रकाश धौलाकोटी, र वैकुण्ठराज पराजुली सदस्य रहेका छन् ।
चैत १५ गते पूर्व राजा ज्ञानेन्द्र शाहका समर्थकले तीनकुनेस्थित अन्नपूर्ण मिडिया ग्रुपको भवनमा तोडफोड र आगजनी गरेका थिए। सोही आगजनीमा परेर एभिन्युज टेलिभिजनका पत्रकार सुरेश रजकको मृत्यु भएको थियो ।महासंघले कान्तिपुर टेलिभिजनको भवनमा समेत प्रदर्शनकारीले जबरजस्ती प्रवेश गर्न खोजेको र सुरक्षाकर्मीले रोकेपछि ढुंगामुढा गरी समाचार कक्षसम्म आतंक सिर्जना गरेको जनाएको छ ।
प्रदर्शनका क्रममा पत्रकार दिनेश गौतम घाइते भएका छन् । प्रदर्शनकारीले हिमालयन टेलिभिजनको सवारी साधनमा समेत तोडफोड गरेको महासंघले जनाएको छ ।
नेपाल पत्रकार महासंघले पत्रकारमाथि कुनै पनि प्रकारको हिंसा र आक्रमण सह्य नहुने भन्दै दोषीलाई शीघ्र कारबाही गर्न माग गरेको छ । महासंघले पत्रकार र सञ्चार माध्यममा भइरहेको आक्रमणले लोकतन्त्रका आधारभूत मूल्य र प्रेस स्वतन्त्रतामाथि खतरा उत्पन्न भएको भन्दै सरकारलाई यथाशीघ्र दोषीमाथि कडा कारबाही गर्न माग गरेको छ ।
-1729995576.jpeg)
