मधेश प्रदेशका मुख्यमन्त्री सतिशकुमार सिंहले सिरहाको मिर्चैया क्षेत्रमा सञ्चालित निजी अस्पतालहरूमा छड्के अनुगमन गरेका छन् ।
शनिबार साँझ १४ अस्पताल अनुगमन गरिएकोमा १३ अस्पताललाई बन्द गराएका छन् । भने सिद्धकामना हस्पिटलका दुईजना कर्मचारीलाई पक्राउ परेका छन् । अस्पतालमा बिरामी भर्ना भए पनि अनुगमन टोली पुग्नेबित्तिकै सटर बन्द गरी भाग्न खोजेपछि उनीहरूलाई प्रहरीले नियन्त्रणमा लिएको जनस्वास्थ्य अधिकृत सन्तोष कुमार ठाकुरले जानकारी दिए ।
मुख्यमन्त्री सिंहका अनुसार बन्द गरिएका अस्पतालहरूमा सिद्धकामना हस्पिटल, विष्णु पोलिक्लिनिक, बालसंसार हेल्थ केयर, बालकल्याण हेल्थ केयर, समित माउन्ट हस्पिटल, एसजेके पोलिक्लिनिक, मंगलम हेल्थ केयर सेन्टर, शान्ति हेल्थ केयर, श्रीराम ओरल एन्ड डेन्टल क्लिनिक, रेखा नर्सिङ होम, मिथिला आँखा उपचार केन्द्र, लक्ष्मी हेल्थ केयर, र लाइफ लाइन क्लिनिक रहेका छन् ।
तीमध्ये धेरैजसो अस्पताल दर्ताविनै सञ्चालनमा रहेको तथा केही नवीकरण नगरी गैरकानुनी रूपमा सेवा दिइरहेको पाइएकाले बन्द गरिएको मुख्यमन्त्री सिंहले बताए । अनुगमनका क्रममा मापदण्ड विपरीत सञ्चालनमा रहेको मनकामना मिड इस्टर्न अस्पताललाई १५ दिने समयसीमा तोकिएको छ ।
उक्त अस्पतालले १५ बेडको स्वीकृति पाए पनि सोभन्दा बढी सेवा सञ्चालन गरिरहेको भेटिएपछि १५ दिनभित्र स्वास्थ्य मन्त्रालयबाट अनुगमन गराउन निर्देशन दिइएको हो ।
त्यसैगरी, मिर्चैयास्थित कटारी चोकमा सञ्चालित मुंगेरिया स्वीट्स एन्ड चाट हाउसको कारखाना समेत सिल गरिएको छ । खाद्य सुरक्षा मापदण्ड उल्लंघन गर्दै अखाद्य तथा कुहिएका पदार्थ प्रयोग गरी खाद्य वस्तु उत्पादन गरेको पाइएकोले कारखानालाई बन्द गरिएको हो ।
आइतबार सम्बन्धित निकायले उक्त कारखानाबाट खाद्य नमूना संकलन गर्ने र परीक्षणपछि कानुनअनुसार कारबाही अघि बढाइने मुख्यमन्त्री सिंहले जानकारी दिएका छन् । मिर्चैया क्षेत्रमा गुणस्तरीय स्वास्थ्य सेवा सुनिश्चित गर्न सरकारले अवैध रूपमा सञ्चालन भएका अस्पताल तथा स्वास्थ्य संस्थाहरूमा थप कडाइ गर्ने चेतावनी समेत दिएका छन् ।
-1729995576.jpeg)
