वीरगंज महानगरपालिकाको सरसफाई अधिकृत सरफुदिन मियामाथि तेल चोरी गरेको आरोप लागेपछि महानगरले स्पष्टिकरण सोधेको छ ।
फोहोरमैला व्यवस्थापन शाखाका प्रमुख समेत रहेका मियालाई महानगरपालिकाको ३२ वडाका लागि लामखुट्टे मार्ने औषधी छर्ने जिम्मेवारी दिइएको थियो । विभिन्न व्यक्तिहरुबाट पिठयूमा बोकेर लामखुट्टे मार्ने औषधीको जिम्मेवारी उनलाई दिइएको थियो । औषधीमा लाग्ने मट्टितेल भण्डारण गरेर घपला गरेको भन्दै स्पष्टिकरण सोधिएको हो ।
महानगरका प्रमुख प्रशासकीय अधिकृत अरविन्द कुमार कर्णले मियालाई यसअघि ६ सय लिटरको कुपन दिएका थिए । तर, उक्त तेल सकिएको भन्दै मिया पुनः कुपन लिन आएपछि शंका लागेर प्रमुख प्रशासकीय अधिकृत कर्णले अबेर राति ८ बजे सरसफाई शाखाको तेल भण्डारण कक्षमा छड्के निरीक्षण गरेका थिए । सो क्रममा दुईवटा ग्यालेनमा ८० लिटर मट्टितेल र ड्रममा ४ सय लिटर डिजल फेला परेको थियो ।
महानगर स्रोतका अनुसार, जब निरीक्षणका लागि प्रमुख प्रशासकीय अधिकृत सहितको टोलि पुगे, मियाले ग्यालेन खाली छ भनेर जानकारी दिन लगाएका थिए । तर, राति ८ः३० बजे पुनः फर्किएर निरीक्षण गर्दा ग्यालेन र ड्रमतभित्र तेल भेटिएको थियो । तेल भेटेपछि उक्त कक्षमा नयाँ ताला लगाइदिएको छ भने उनलाई कार्वाही किन नगर्ने भनेर स्पष्टिकरण सोधिएको महानगरले जनाएको छ ।
यसअघि पनि बारम्बार तेल चोरीको आशंका उठ्दै आएकाे थियाे प्रमुख प्रशासकीय अधिकृत ज्यूले नै फेला पारेकाे भन्ने कुरा छ, महानगरपालिकाले मियासँग यसपटक स्पष्टिकरण माग गरेको वीरगंज महानगरपालिकाका सुचना अधिकारी सुनिल कर्णले बताए । वडाको विभिन्न स्थानमा छर्दै आएका सरफुदिन मियालाई किन निलम्बन नगर्ने भन्ने विषयमा पत्र काटेको हो ।
प्रमुख प्रशासकीय अधिकृत कर्णले महानगरमा अनुशासन कायम राख्न अनियमिततामा संलग्न कसैलाई पनि नछाड्ने बताउदैँ आएका छन् ।
यता, सरसफाई अधिकृत मियाले भने आफूले कुनै तेल चोरी नगरेको दाबी गरेका छन् । उनले लामखुट्टे मार्ने औषधी छर्न केमिकलमा मिसाउन र गाडी सञ्चालन गर्न तेल आवश्यक पर्ने भएकाले माग गरेको बताए । उनले रुटिन अनुसार औषधी छर्ने क्रममा मैले मागेको थिएँ, चोरी नगरेको दाबी गरे ।
महानगरबाट स्पष्टिकरण मागिएको बारेमा आफूकहाँ नपुगेकाले यसबारेमा जानकारी नभएको मियाँले बताए ।
* मट्टीतेलकाे साथमा ४ सय लिटर डिजल समेत बरामद गरेकाे छुटेकाेमा अपडेट गरिएकाे छ । - समाचार सम्पादक
-1729995576.jpeg)
