सीमा क्षेत्रमा हुने खुला चोरी तस्करी तथा चन्दा आतंकका कारण उद्योगी व्यवसायीहरू मर्कामा परेको सप्तरी उद्योग वाणिज्य संघका अध्यक्ष लालु प्रसाद अग्रवालले बताएका छन् ।
राजविराजस्थित संघको कार्यालयमा आइतबार आयोजित पत्रकार भेटघाट कार्यक्रममा अध्यक्ष अग्रवालले सप्तरी जिल्लामा भारतीय सीमाबाट हुने तस्करी नियन्त्रण नहुँदा स्थानीय व्यवसाय धरासायी बन्दै गएको बताए । उनका अनुसार, बजारमा सस्तो मूल्यमा तस्करीका सामान छ्यापछ्याप्ती पाइने भएकाले स्थानीय उत्पादनले प्रतिस्पर्धा गर्न नसक्दा उद्योगहरू धमाधम बन्द भइरहेका छन् ।
अध्यक्ष अग्रवालले सप्तरीका व्यवसायीहरूले बैंकबाट सहज रूपमा ऋण नपाउने समस्या भोग्दै आएको पनी बताए । उनले ऋण लिएर व्यवसाय सञ्चालन गर्नेहरूलाई अनावश्यक रूपमा तनाव दिने प्रवृत्तिले गर्दा व्यवसायीहरू अन्यत्र सर्न बाध्य भएको दाबी गरे ।
चोरी तस्करी नियन्त्रण गर्न प्रमुख जिल्ला अधिकारी (सिडिओ) र जिल्ला प्रहरी प्रमुख (एसपी) लाई पटकपटक आग्रह गरिए पनि प्रशासनले सुनुवाइ नगरेको उनको गुनासो छ । ‘चोरी तस्करीमा प्रहरी प्रशासनकै संलग्नता छ भन्ने त मिल्दैन,’ अध्यक्ष अग्रवालले भने, ‘तर खुला तस्करी नरोकिँदा मिलेमतोमा नै भइरहेको भन्ने शंका गर्न सकिन्छ ।’
व्यवसायीहरूले चोरी तस्करीका कारण समस्या खेप्नुपर्ने मात्रै नभई पछिल्लो समय धार्मिक कार्यक्रम तथा विभिन्न पार्टी समूहहरूद्वारा चन्दा आतंक झेल्नुपरेको बताएका छन् । अग्रवालका अनुसार, सप्तरीका विभिन्न स्थानमा महायज्ञ तथा अन्य धार्मिक कार्यक्रमको नाममा चन्दा उठाउने प्रवृत्ति बढेकाे बताए ।
‘चन्दा उठाउनेको भिड थेग्नै नसक्ने अवस्था आएको छ,’ उनले भने, ‘तर प्रशासनले कुनै चासो दिएको छैन ।’ करोडौं खर्च गरिने कार्यक्रमहरूबाट स्थानीय उद्योगी व्यवसायी प्रत्यक्ष मारमा पर्ने हुँदा प्रशासनले ध्यान दिनुपर्ने उनको माग छ ।
नेपाल उद्योग वाणिज्य महासंघका केन्द्रीय सदस्य अरुण कुमार प्रधानले उद्देश्यविहीन तथा औचित्यहीन कार्यक्रमहरूलाई प्रशासनले अनुमति दिनु गलत भएको बताए ।
‘सप्तरी मात्रै नभइ, सीमा क्षेत्रका अन्य जिल्लाका व्यवसायी पनि चोरी तस्करीका कारण प्रभावित छन्,’ उनले भने, ‘राज्यलाई पटकपटक ध्यानाकर्षण गराउँदा पनि कुनै चासो नदेखिएको आरोप लगाए ।’
-1729995576.jpeg)
