जिल्ला प्रहरी कार्यालय पर्साले प्रहरी र विद्यार्थीबीच सामाजिक घटनासम्बन्धी एक दिवसीय कार्यक्रम सम्पन्न गरेको छ ।
वीरगञ्जको पानीटंकीस्थित डेसिमल कलेजको कानुन संकायमा अध्ययनरत ६० जना विद्यार्थीहरूले प्रहरी कार्यालयका विभिन्न फाँटहरूको अवलोकन गरी प्रहरीको सेवा, कानुनी कार्यान्वयन प्रक्रिया र सामाजिक अपराध नियन्त्रणबारे प्रत्यक्ष जानकारी लिएका छन् ।
जिल्ला प्रहरी कार्यालय पर्साका प्रहरी उपरीक्षक (एसपी) गौतम मिश्रले कार्यालयबाट प्रदान गरिने सेवाहरू, नागरिक सुरक्षामा प्रहरीको भूमिका, अपराध नियन्त्रण, साइबर सुरक्षाका चुनौतीहरू तथा सामाजिक घटनाहरूको रोकथाममा युवाहरूको योगदान लगायतको बारेमा जानकारी गराएका थिए ।
डेसिमल कलेजका संस्थापक अध्यक्ष सन्नी दुबेले प्रहरी र विद्यार्थीबीचको संवादले कानुन संकायका विद्यार्थीहरूलाई व्यावहारिक ज्ञान प्रदान गर्न मद्दत गर्ने बताए । आजको जानकारीले हाम्रा विद्यार्थीहरूलाई प्रहरीको दैनिक कार्य प्रणाली र चुनौतीहरू बुझ्ने अवसर दिएको छ । यस्ता कार्यक्रमले उनीहरूको शैक्षिक अध्ययनमा ठूलो योगदान पुर्याउने उनले बताए ।
कार्यक्रम अन्तर्गत विद्यार्थीहरूले जिल्ला प्रहरी कार्यालयका वलोकनका क्रममा उनीहरूले अपराध अनुसन्धान, ट्राफिक व्यवस्थापन, महिला तथा बालबालिका सेल, सामुदायिक प्रहरी सेवा लगायतका विषयमा समेत जानकारी लिएका थिए ।
प्रहरी प्रमुख एसपी मिश्रको कार्यकक्षमा आयोजित एक घण्टे संवाद सत्रमा विद्यार्थीहरूले विभिन्न जिज्ञासाहरू राखेका थिए । अपराध नियन्त्रण, साइबर सुरक्षा, लैंगिक हिंसा, सामाजिक जागरूकता, ट्राफिक नियम लगायतका विषयमा छलफल गरिएको थियो ।
कार्यक्रममा सहभागी कानुन संकायकी विद्यार्थीले हामीले किताबमा पढ्ने कानुनी प्रक्रिया प्रत्यक्ष रूपमा अवलोकन गर्न पाएको बताए । प्रहरी उपरीक्षकज्यूसँगको संवादले हामीलाई कानुन कार्यान्वयनका वास्तविक चुनौतीहरू बुझ्न मद्दत पुगेको बताए ।
-1729995576.jpeg)
