चार दिनदेखि हराइरहेका राहुल साहको शव गाडिएको अवस्थामा फेला परेको छ । हत्या आरोपमा प्रहरीले ६ जनालाई पक्राउ गरेको छ, जसमा ५ नेपाली र १ भारतीय नागरिक रहेका छन् ।
सर्लाहीको चक्रघट्टा गाउँपालिका–८ घर भई काठमाडौं गोकर्णेश्वरको बाहुनधारा बस्दै आएका १९ वर्षीय राहुल साह ११ चैतदेखि हराएका थिए । परिवारले प्रहरी वृत्त बौद्धमा उजुरी दर्ता गरेपछि प्रहरीले खोजी कार्य सुरु गरेको थियो ।
१५ चैतमा अनुसन्धानका क्रममा प्रहरीले माकलबारीमा सञ्चालित आरके मोटरसाइकल वर्कसपको पछाडिको जमिनमा गाडिएको अवस्थामा शव फेला पारेको थियो । शव भेटिएपछि प्रहरीले हत्या भएको निष्कर्ष निकाल्दै अनुसन्धान अघि बढायो ।
प्रहरीका अनुसार राहुल साहको हत्या आरोपमा पक्राउ पर्नेहरूमा सर्लाहीका पाँच जना र भारतका एक नागरिक रहेका छन् । हत्या अराेपमा भारत, बिहार, हाल काठमाडौं दक्षिणढोका बस्ने सुनिल शर्मा (२९ वर्ष), सर्लाहीकाे चक्रघट्टा गाउँपालिका–१ बस्ने निपु मण्डल (२२ वर्ष), सर्लाहीकाे चक्रघट्टा गाउँपालिका ६ का विजय यादव (१८ वर्ष), यस्तै साेही स्थानका करन कुमार महतो (१८ वर्ष), जोधन मण्डल (२३ वर्ष), उत्तम मण्डल (४५ वर्ष) रहेका छन् ।
प्रारम्भिक अनुसन्धान अनुसार, उनीहरूबीच लेनदेनको विषयमा विवाद हुँदा राहुल साहको हत्या भएको खुलेको छ ।
पक्राउ परेकाहरूले हत्या योजना बनाएर राहुलको शव माकलबारीमा गाडेका थिए ।
घटनाबारे थप अनुसन्धान भइरहेको जिल्ला प्रहरी परिसर काठमाडौंले जनाएको छ ।
-1729995576.jpeg)
