राष्ट्रिय स्वतन्त्र पार्टीका सभापति रवि लामिछाने पाँच महिनापछि पार्टी कार्यालयमा फर्किएका छन् ।
सोमबार पार्टीको केन्द्रीय कार्यालय चमतीमा पुगेका लामिछानेलाई उनका समर्थक र पार्टी कार्यकर्ताहरूले भव्य स्वागत गरेका छन् ।
लामिछानेले कार्यकर्ताहरूलाई सम्बोधन गर्दै आफूलाई दुई तिहाइको सरकारले ‘ज्युँदै छोड्नु नै आफ्नो जीत’ भएको टिप्पणी गरे । उनले भने, “दुई तिहाइको सरकारले मलाई ज्युँदै छोडेको छ, यही नै मेरो जीत हो ।” सोमबार दिउँसो ३ बजे पार्टीको केन्द्रीय समितिको बैठक बस्ने तय भएको छ, जसको सभापतित्व लामिछानेले गर्नेछन् ।
बैठकअघि कार्यवाहक सभापति डिपी अर्यालले धन्यवाद ज्ञापन गर्ने कार्यक्रम रहेको थियो । सोहि कार्यक्रममा सरकारले शिर माथिको तलवार खसाउन पर्सामा मुद्दा नबुझाएर बसेको बताए । उनले सिध्याउने नियतले सिंङ्गो राज्य लागेको उनले बताए ।
लामिछानेको अध्यक्षतामा बस्ने बैठकमा पछिल्लो राजनीतिक घटनाक्रमको समीक्षाका साथै पार्टीको आन्तरिक रणनीति, नेतृत्व विकासका लागि लिडरसिप एकेडेमीको संरचना, जनयात्रा कार्यक्रम, देशव्यापी जागरण अभियान, र आसन्न महाधिवेशनको तयारीबारे विस्तृत छलफल हुने सचिवालयले जनाएको छ ।
राष्ट्रिय स्वतन्त्र पार्टीले देशभर राजनीतिक गतिविधि विस्तार गर्ने योजना बनाएको छ ।
विशेष गरी, महाधिवेशनलाई लक्षित गर्दै पार्टी संगठनलाई बलियो बनाउने रणनीतिमा छलफल हुनेछ ।
-1729995576.jpeg)
