बाराको कोल्हवी नगरपालिका–८, नयाँवस्तीस्थित श्रीकृष्ण प्रणामी मन्दिरमा तीन दिवसीय आध्यात्मिक धर्म जागरण संगोष्ठी सुरू भएको छ ।
श्रीकृष्ण प्रणामी सेवा समिति बारा–पर्साको आयोजनामा मंगलबारदेखि सुरू भएको उक्त धार्मिक कार्यक्रम चैत्र २० गतेसम्म सञ्चालन हुनेछ । संगोष्ठीको उद्घाटन प्रणामी मन्दिर निजनामधाम, नजरपुर (रौतहट) का गादीपति श्री १०८ सुरेन्द्र महाराजजीले दीप प्रज्वलन गरेर गरेका थिए ।
उद्घाटन समारोहमा सेवा समिति बारा–पर्साका अध्यक्ष अर्जुन प्रसाद घिमिरेको अध्यक्षतामा विभिन्न आध्यात्मिक व्यक्तित्वहरूले मन्तव्य राखेका थिए । कार्यक्रममा विशेष प्रशिक्षणका लागि भागवताचार्य, वाणी विषारद नवीनकृष्ण शास्त्री, कथाकार श्यामदास कुबर, श्रीकृष्ण प्रणामी युवा परिषद् मधेश प्रदेशका सचिव उमेश सापकोटा, युवा परिषद् बाराका अध्यक्ष मोहन सापकोटा, बाईजुराज महिला समिति बारा–पर्साकी अध्यक्ष मन्दिरा उप्रेती लगायतको उपस्थिति थियो ।
बाराको निजगढ, सिमरा, मधुवन, कलैया तथा पर्साको वीरगञ्ज लगायतका स्थानबाट निजानन्द सम्प्रदायका भक्तजनहरू सहभागी रहेका छन् ।
संगोष्ठीका क्रममा धार्मिक प्रवचन, आध्यात्मिक साधना, कीर्तन, भजन तथा समाजसेवाका विभिन्न कार्यक्रमहरू गरिने आयोजकले जनाएको छ । उद्घाटन कार्यक्रममा सेवा समिति बारा–पर्साका उपाध्यक्ष होमनाथ उप्रेतीले स्वागत मन्तव्य दिएका थिए भने कार्यक्रमको सञ्चालन सचिव विनोद कार्कीले गरेका थिए ।
संगोष्ठीबारे जानकारी मधुवन मन्दिर समितिका अध्यक्ष रामचन्द्र सुवेदीले दिएका छन् ।
-1729995576.jpeg)
