वीरगञ्जस्थित सुक्खा बन्दरगाहको सञ्चालनका लागि भारतीय कम्पनी प्रिस्टिन भ्याली ले आगामी पाँच वर्षको लागि ठेक्का पाएको छ ।
आर्थिक वर्ष २०८२/८३ को साउनदेखि लागु हुने गरी प्रिस्टिन भ्यालीलाई पुनः पाँच वर्षका लागि बन्दरगाह सञ्चालनको अनुमति दिइएको हो । यसअघि पनि विगत पाँच वर्षदेखि सोही कम्पनीले बन्दरगाह सञ्चालन गर्दै आएको थियो ।
सुक्खा बन्दरगाह सञ्चालनका लागि न्यूनतम ठेक्का रकम तीन अर्ब ४८ करोड तोकिएको थियो । प्रिस्टिन भ्यालीले चार अर्ब ७१ करोड रुपैयाँमा ठेक्का सकार गरेको छ भने प्रतिस्पर्धामा रहेको भारतीय कम्पनी कन्कर ले चार अर्ब ५१ करोड को प्रस्ताव गरेको थियो । कन्करभन्दा २० करोड बढी प्रस्ताव गर्दै प्रिस्टिन भ्यालीले ठेक्का प्राप्त गरेको हो ।
यसअघि, वीरगञ्ज सुक्खा बन्दरगाहको पहिलो सञ्चालक भारत सरकारको कम्पनी कन्कर थियो । सन् २००४ देखि १५ वर्षसम्म सुक्खा बन्दरगाह सञ्चालन गरेको कन्करले पाँच वर्षको ठेक्का ८२ करोड रुपैयाँ मा मात्रै सकार गरेको थियो । नेपाल सरकारले सुक्खा बन्दरगाह सञ्चालनका लागि न्यूनतम ठेक्का रकम क्रमशः वृद्धि गर्दै गएको छ ।
अघिल्लो कार्यकालमा सरकारको न्यूनतम ठेक्का मूल्य तीन अर्ब २५ करोड तोकिएको थियो, जसअनुसार प्रिस्टिन भ्यालीले तीन अर्ब ३३ करोड मा ठेक्का लिएको थियो । सुक्खा बन्दरगाह नेपालको अन्तर्राष्ट्रिय व्यापारको मुख्य नाका हो, जसले भारत र अन्य मुलुकहरूसँगको व्यापार सहज बनाउने महत्त्वपूर्ण भूमिका खेल्छ ।
व्यापारिक क्षेत्रमा नयाँ ठेक्का प्रक्रिया पारदर्शी रूपमा सम्पन्न भएको बताइए पनि नेपालका व्यापारी तथा सरोकारवालाहरूले सेवा सुधार र शुल्क व्यवस्थापनलाई व्यवस्थित बनाउन आग्रह गरेका छन् ।
-1729995576.jpeg)
