आम जनता पार्टी (आजपा) का अध्यक्ष तथा पूर्वमन्त्री प्रभु साहले मधेसवादी दलका नेताहरूको दोहोरो चरित्रका कारण मधेस दिनप्रतिदिन उजाड बन्दै गएको टिप्पणी गरेका छन् ।
आज वीरगंजमा आजपाले आयोजना गरेको पत्रकार सम्मेलनलाई सम्बोधन गर्दै अध्यक्ष साहले मधेसवादी दलका नेताहरू सरकारमा रहेर पनि मधेसका लागि काम नगरेको आरोप लगाए । अध्यक्ष साहले मधेसका नेताहरू सत्तामा हुँदा पनि विकासका लागि कुनै प्रभावकारी कदम नचालेको दाबी गरे। "सत्ता बाहिर हुँदा यो भएन, त्यो भएन भनेर हल्ला गर्ने मधेसका ठेकेदारहरू सरकारमै बसेर पनि किन मधेसका लागि काम गर्दैनन् ? संघीय सरकारदेखि मधेस प्रदेश सरकारसम्म उनीहरूकै पकड छ, तर विकासका लागि योजना नबनाउने, बनेका योजना कार्यान्वयन नगर्ने काम भइरहेछ," उनले भने ।
विशेषगरी वीरगंजबाट तीन जना नेता संघीय सरकारमा रहेर पनि यस क्षेत्रको विकासमा योगदान दिन नसकेकोप्रति उनले कटाक्ष गरे । "यी नेताहरूको मुख्य उद्देश्य सत्ता टिकाइराख्नु मात्रै हो, मधेसको समृद्धि होइन," साहले आरोप लगाए ।
साहले संघीय सरकारका मधेसी नेताहरूलाई लुट, भ्रष्टाचार र अनियमिततामा संलग्न रहेको गम्भीर आरोप लगाए। "उनीहरूबाट अब केही अपेक्षा गर्नु बेकार छ । मधेसका लागि केही गर्नुपर्छ भन्ने सोच उनीहरूसँग नै छैन," उनले भने । मधेस प्रदेश सरकार पनि विकासका लागि आवश्यक कदम चाल्न असफल भएको उनको भनाइ छ । "सत्ता टिकाइराख्न अनेक बहाना बनाउने र जब सत्ताबाट हटाइन्छ, तब यो भएन, त्यो भएन भन्दै नाटक गर्ने प्रवृत्ति देखिएको छ," साहले भने ।
साहले वर्तमान राजनीतिक व्यवस्थालाई लुट, भ्रष्टाचार र दलाल प्रवृत्तिले ग्रसित रहेको बताउँदै तेस्रो जनआन्दोलन अपरिहार्य भएको उल्लेख गरे। "लुटतन्त्रकै कारण मुलुक बर्बाद भइरहेको छ। अब तेस्रो जनआन्दोलन सफल बनाउनुपर्छ," उनले जोड दिए ।
उनले २४ चैतमा काठमाडौंमा हुने तेस्रो जनआन्दोलनको तयारीका लागि रौतहट, बारा र पर्सामा कार्यक्रमहरू आयोजना गरिएको जानकारी दिए । उनले आम जनतालाई आन्दोलनमा सहभागी हुन आह्वान गर्दै भने, "भ्रष्ट, लुटेरा, दलाल नेताहरूको कारण मुलुक समृद्ध बन्न सकेको छैन । अब यो व्यवस्था बदल्नु जरुरी छ।" अध्यक्ष साहले वर्तमान संविधान र सरकार दुवै असफल भइसकेको दाबी गरे । "जनताको सर्वोच्चता सहितको शासन व्यवस्था नभएसम्म मुलुक समृद्ध हुन सक्दैन। अहिलेको व्यवस्था नै संकटको मुख्य कारण हो," उनले बताए ।
उनका अनुसार, देशको वर्तमान राजनीतिक अवस्था अन्यौलग्रस्त, अस्तव्यस्त र संकटग्रस्त छ। "जनतामा राजनीतिप्रति विकर्षण बढ्दैछ । दल र नेताप्रति घृणा फैलिएको छ । राजनीतिक शक्तिहरूबीच टकराव बढ्दै गएको छ। जनआक्रोशको कारण समाज तीव्र ध्रुवीकरण हुँदै गएको छ," साहले भने ।
उनले अगाडि भने, "अहिलेको आवश्यकता भनेको अग्रगामी विचार, सही नेतृत्व र मुलुकलाई निकास दिने सक्षम नीति हो । त्यसका लागि तेस्रो जनआन्दोलन आवश्यक छ ।"
-1729995576.jpeg)
