जिल्ला ट्राफिक प्रहरी कार्यालय पर्साले चालू आर्थिक वर्षको आठ महिनामा मात्र ट्राफिक नियम उल्लङ्घन गर्ने १९ हजार २ सय ८६ जनालाई कारबाही गरेको छ ।
ट्राफिक व्यवस्थापन सुधारका लागि वीरगंज महानगरपालिका र ग्रामीण क्षेत्रका विभिन्न स्थानहरूमा अस्थायी ट्राफिक पोस्टमार्फत चेकजाँच अभियान सञ्चालन गर्दै आएको कार्यालयले यस अवधिमा एक करोड ७५ लाख ६० हजार ८ सय ५० रुपैयाँ राजश्व संकलन गरेको छ ।
जिल्ला ट्राफिक प्रहरी कार्यालयका अनुसार सवारीसाधनको चापका साथै यस क्षेत्रमा लापरबाही, तीव्र सवारी गति, मापसे, लेन अनुशासन उल्लङ्घन, सवारी जाँच नवीकरण नगर्ने, हेल्मेट नलगाउने, सीट बेल्ट प्रयोग नगर्ने जस्ता विभिन्न कारणले ट्राफिक नियम उल्लङ्घन हुने गरेको छ ।
ट्राफिक प्रहरी कार्यालयको तथ्याङ्क अनुसार चालू आवको आठ महिनामा पर्सा जिल्लाका विभिन्न स्थानमा ४ सय ८८ वटा सवारी दुर्घटना भएका छन् । ती दुर्घटनामा ७ सय ३५ सवारी साधन परेका थिए । दुर्घटनाबाट २७ जनाको ज्यान गएको छ भने ७ सय ४४ जना घाइते भएका थिए ।
ट्राफिक कार्यालयका अनुसार घाइतेमध्ये केहीको अवस्था गम्भीर छ भने केहीले उपचारपछि पुनः सामान्य जीवन बिताइरहेका छन् ।
ट्राफिक नियम उल्लङ्घन गर्दा तिर्नुपर्ने जरिवाना, सवारी नवीकरण विलम्ब शुल्क, मापसे चेकजाँचको जरिवाना, लेन अनुशासन उल्लङ्घन र पार्किङ नियम उल्लङ्घन लगायतबाट चालू आर्थिक वर्षको आठ महिनामा मात्रै पर्सा ट्राफिक कार्यालयले रु एक करोड ७५ लाख ६० हजार ८५० राजस्व सङ्कलन गरेको कार्यालयले जनाएको छ ।
पर्सा जिल्लामा बढ्दो सवारी चाप, अव्यवस्थित सडक संरचना, अपर्याप्त पार्किङ सुविधा, र सवारी नियम पालनामा देखिएको लापरबाही ट्राफिक व्यवस्थापनका मुख्य चुनौती हुन् ।
ट्राफिक दुर्घटना न्यूनीकरणका लागि जिल्ला ट्राफिक कार्यालय पर्साले विभिन्न जनचेतनामूलक कार्यक्रम सञ्चालन गर्दै आएको छ । चालू आवको आठ महिनामा मात्रै ७ सय २५ वटा जनचेतनामूलक कार्यक्रम आयोजना गरिएको जनाएको छ । ती कार्यक्रमहरुबाट एक लाख छ हजार ३५७ जनालाई ट्राफिक नियमबारे सचेतना दिइएको कार्यालयले जनाएको छ ।
विद्यालय, कलेज, सार्वजनिक स्थल, तथा व्यस्त चोकहरूमा आयोजित सचेतना कार्यक्रमबाट सवारी चालक, यात्रु, विद्यार्थी, मोटरसाइकल चालक र पैदल यात्रुलाई ट्राफिक नियमको महत्त्व र दुर्घटनाबाट बच्न अपनाउनुपर्ने सावधानीबारे जानकारी गराइएको थियो ।
पर्सा ट्राफिक कार्यालयका प्रमुखका अनुसार दुर्घटना न्यूनीकरण गर्नका लागि थप जनचेतना कार्यक्रम, कडाइका साथ ट्राफिक नियम कार्यान्वयन, तथा लेन अनुशासन कडाइका साथ लागू गर्ने योजना रहेको छ ।
-1729995576.jpeg)
