महागढीमाई नगरपालिका–५ स्थित नेपाल राष्ट्रिय माध्यमिक विद्यालय बगडमपुरमा प्रावि करारका शिक्षक सरोज पासवान प्रधानाध्यापकको जिम्मेवारीमा रहेको खुलासा भएको छ ।
स्थानीय तहहरूले शिक्षाको गुणस्तर सुधार गर्ने प्रतिबद्धता जनाए पनि नगरपालिकाको शिक्षा शाखाले नियमविपरीत प्रधानाध्यापक नियुक्ति गरेको स्थानीयहरूले आरोप लगाएका छन् । नियमअनुसार माध्यमिक विद्यालयमा प्रधानाध्यापक मावि तहका शिक्षक हुनुपर्ने भएपनि प्रावि करार शिक्षक पासवानलाई उक्त पदमा जेष्ठताको आधारमा नियुक्त गरिएको शिक्षा शाखाले जनाएको छ ।
विद्यालय सञ्चालनका क्रममा प्रधानाध्यापक सरोज पासवान माथि विभिन्न अनियमितताको आरोप पनि लागेका छन् । उनले बालविकास शिक्षिकाको विज्ञापन प्रक्रिया आफ्ना मान्छेलाई नियुक्त गर्न ल्याएको आरोप स्थानीयले लगाएका छन् ।
विद्यार्थीहरूको खाजा कार्यक्रम र कम्प्युटर ल्याबको बजेटमा समेत अनियमितता गरेको कतिपयको आरोप छ ।
प्रधानाध्यापक पासवानले आफ्ना दाजु मनोज पासवानलाई विद्यालयमा हाजिरी गराएर तलब दिने गरेको, तर मनोज पासवान नियमित विद्यालय नआउने गरेको स्थानीय बताउँछन् ।
विद्यालयमा राहत शिक्षकका रूपमा नियुक्त मनोज पासवान हप्तामा एक दिन मात्र उपस्थित भएर हप्ताभरको हाजिरी बनाउने गरेको विद्यार्थीहरूले नै आरोप लगाएका छन् । उनका नाममा विद्यालयबाट पूर्ण तलब भुक्तानी गरिँदै आएको आरोप अभिभावकहरूले लगाएका छन् ।
यता प्रधानाध्यापक सरोज पासवान ले भने सबै आरोपहरू निराधार रहेको बताएका छन् । उनले विद्यालयको कुनै पनि बजेटमा अनियमितता नभएको दाबी गर्दै मनोज पासवान पनि दैनिक रूपमा विद्यालय आउने गरेको जिकिर गरेका छन् ।
महागढीमाई नगरपालिकाका शिक्षा शाखा प्रमुख रामविश्वास चौरसियाले विद्यालयमा तत्काल माध्यमिक शिक्षकको दरबन्दी नभएको भन्दै जेष्ठताको आधारमा प्रधानाध्यापक नियुक्त गरिएको बताएका छन् । उनले आगामी शैक्षिक सत्रदेखि मावि शिक्षकलाई प्रधानाध्यापक बनाउने तयारी भइरहेको स्पष्ट पारे ।
-1729995576.jpeg)
