मधेश प्रदेश क्रिकेट संघले वार्षिक खेलाडी सम्झौता गर्दै ८ जना पुरुष र २ जना महिला खेलाडीलाई अनुबन्धन गरेको छ ।
संघले मधेश प्रदेशका उत्कृष्ट खेलाडीहरूलाई प्रोत्साहन गर्दै खेलको स्तर उकास्ने उद्देश्यले वार्षिक सम्झौताका लागि चयन गरेको हो । पुरुष खेलाडीमा पवन सर्राफ, हरिशंकर साह, अभिषेक तिवारी, रोहन बिके, विशाल पटेल, अरनिको यादव, प्रदीप पासवान, रञ्जित कुमार रहेका छन् । महिला खेलाडी तर्फ रोजी कडारी र अलिशा यादव छनोट भएका छन् ।
सम्झौता भएका खेलाडीलाई मासिक १० हजार रुपैयाँ उपलब्ध गराइने मधेश प्रदेश क्रिकेट संघले जनाएको छ ।
उक्त रकम प्रत्येक तीन महिनामा एकमुष्ट रुपमा प्रदान गरिने संघका कोषाध्यक्ष सुवास जयसवालले जानकारी दिए । नेपाल क्रिकेट संघ (क्यान) ले वार्षिक सेन्ट्रल कन्ट्रयाक्टमा नपरेका खेलाडीहरूलाई प्रदेशस्तरबाट खेलअभ्यास, आर्थिक सहायता तथा प्रशिक्षणको अवसर प्रदान गर्नुपर्ने आवश्यकता औंल्याउँदै मधेश प्रदेशले पहिलोपटक यस्तो कदम चालेको हो ।
क्यानले यस वर्ष पाँच तहमा वर्गीकरण गर्दै ३३ जना पुरुष र १९ जना महिला खेलाडीलाई सेन्ट्रल कन्ट्रयाक्टमा राखेको छ । ग्रेड ‘ए’ अन्तर्गत कप्तान रोहित पौडेल, सन्दीप लामिछाने, दीपेन्द्र सिंह ऐरी, सोमपाल कामी, आशिफ शेख रहेका छन् भने ग्रेड ‘बी’ मा अनिलकुमार साह, करण केसी, कुशल भुर्तेल, गुलशन झा, ललित राजवंशी परेका छन् ।
महिला क्रिकेटमा क्यानले चार तह वर्गीकरण गर्दै इन्दु बर्मा, पूजा महतो, रुबिना क्षेत्री, सिता राना मगरलाई ग्रेड ‘ए’ मा राखेको छ । महिला खेलाडीहरूका लागि ५० हजारदेखि २० हजारसम्म मासिक तलबको व्यवस्था गरिएको छ ।
मधेश प्रदेश क्रिकेट संघले वार्षिक सम्झौता गरेका खेलाडीहरूको प्रदर्शनको आधारमा आगामी वर्ष थप खेलाडीहरूलाई सम्झौतामा समावेश गर्ने बताएको छ ।
-1729995576.jpeg)
