तीनकुनेमा चैत १५ गते भएको घटनामा मृत्यु भएका कीर्तिपुर–४ का सविन महर्जनलाई एउटा गोली लागेको पुष्टि भएको छ ।
त्रिवि शिक्षण अस्पताल महाराजगञ्जमा गरिएको शव परीक्षण रिपोर्ट अनुसार उनको दायाँ हातबाट छिरेको गोली पछाडिबाट निस्किएको प्रहरीले जनाएको छ ।
राजसंस्था पुनःस्थापनाको माग राख्दै दुर्गा प्रसाई नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियान अन्तर्गत तीनकुनेमा भएको प्रदर्शन उग्र बन्दा प्रहरीले बल प्रयोग गरेको थियो । सोही क्रममा गोली लागेर महर्जनको शिक्षण अस्पतालमा मृत्यु भएको थियो ।
६० राउन्ड गोली प्रहार, ७४६ राउन्ड अश्रुग्यास फायर
काठमाडौं प्रहरी परिसर स्रोतका अनुसार भिड नियन्त्रण गर्न प्रहरीले पेस्तोलबाट २ राउन्ड र राइफलबाट ५८ राउन्ड गरी ६० राउन्ड गोली फायर गरेको थियो । साथै, २३९ राउन्ड कार्टिज प्रयोग गरिएको पाइएको छ, जसलाई छर्राहरू प्रहार गर्न प्रयोग गरिन्छ ।
यसैगरी ७ सय ४६ राउन्ड अश्रुग्यास प्रहार गरिएकोमा तीमध्ये धेरैको म्याद सकिएको भेटिएको छ । प्रहरी स्रोतका अनुसार, म्याद गुज्रिएका अश्रुग्यासका कारण स्वास्थ्यमा गम्भीर असर पर्नसक्ने खतरा बढेको छ ।
त्यस्तै, भिड तितरबितर गर्नका लागि ११९२ ब्ल्यांक राउन्ड (आवाज मात्रै आउने गोली) फायर गरिएको प्रहरी स्रोतले जनाएको छ।
तीनकुने घटनाका क्रममा ५२ जना प्रदर्शनकारी घाइते भएका थिए, जसमा ३५ जना उपचारपछि डिस्चार्ज भएका छन् ।
प्रहरीतर्फ पनि ७३ जना घाइते भएका थिए, जसलाई उपचारपछि घर पठाइएको छ । प्रदर्शन उग्र हुँदा पत्रकार सुरेश रजक समेतको मृत्यु भएको थियो । घटनापछि प्रहरीको बल प्रयोग, गोली प्रहार र अश्रुग्यासको प्रयोगबारे प्रश्न उठिरहेका छन् ।
मृतक महर्जनलाई गोली लागेको भिडियो बाहिरिएपछि प्रहरीले अनुसन्धानलाई तीव्र बनाएको जनाएको छ ।
-1729995576.jpeg)
