काठमाडौं । काठमाडौंको टोखा, झोरमा ट्रकमा लुकेको २५ करोड बराबरको डलर र युरोको मालिकको पहिचान खुलेको छ । प्रहरीको अनुसन्धान र विज्ञको मद्दतबाट शङ्कास्पद व्यक्तिको पहिचान सार्वजनिक भएको हो ।
प्रहरीका अनुसार, उक्त रकम सिन्धुपाल्चोकको भोटेकोशी गाउँपालिका–४ का स्थायी निवासी नारायण पौडेलको भएको पुष्टि भएको छ । पौडेल हाल काठमाडौंको टोखा नगरपालिका–१० मा बसोबास गर्दै आएका छन् ।
गत चैत ४ गते राति ना ७ ख १६५२ नम्बरको ट्रकमा रकम लुकाएर लैजाँदै गर्दा प्रहरीको टोलीले सिन्धुपाल्चोकको भोटेकोशी गाउँपालिका–१ का ४३ वर्षीय चालक कुसान लामालाई पक्राउ गरेको थियो। ट्रकको चालक सिट पछाडि बनाइएको फल्स बटममा रकम लुकाइएको अवस्थामा चालकलाई नियन्त्रणमा लिइएको प्रहरीको भनाइ छ ।
प्रहरीले लामाको बैंक खाताको विवरण जाँच गर्दा अस्वाभाविक कारोबार फेला परेको जनाएको छ । लामाको मोबाइलको सीडीआर विश्लेषण गर्दा पौडेलसँग अन्तिम पटक सम्पर्क भएको जानकारी पनि प्राप्त भएको छ। काठमाडौं उपत्यका अनुसन्धान कार्यालयले पौडेललाई पक्राउ गर्न अदालतबाट पुर्जी जारी गरिसकेको छ ।
प्रहरीले पौडेलको मोबाइल नम्बरको सीडीआर विश्लेषणलाई तीव्र बनाएको छ र सीसीटीभी फुटेज, डिजिटल उपकरणको जाँच पनि जारी राखेको छ । यसका साथै, प्रहरीले पौडेलको घर, कारोबारी स्थल र गोदाममा खानतलासी गर्दा विभिन्न प्रमाणहरू बरामद गरेको पनि पुष्टि भएको छ ।
अहिले अनुसन्धान जारी रहेको र थप जानकारी चाँडै सार्वजनिक हुने प्रहरीको भनाइ छ ।
-1729995576.jpeg)
