काठमाडौं । काठमाडौं महानगरपालिकाका मेयर बालेन्द्र शाह (बालेन) ले शिक्षकहरूको आन्दोलनलाई धन्यवाद दिँदै चेतनशील समाजको निर्माणको अपील गरेका छन् । बुधबार काठमाडौंमा शिक्षा ऐन जारी गर्ने र विगतका सम्झौताहरूको कार्यान्वयनको माग गर्दै शिक्षकहरूले प्रदर्शन गरेका थिए ।
आन्दोलनका क्रममा शिक्षकहरूले आफ्नो आवाज उठाउने क्रममा फोहोर नगरी, केहि नभत्काइ गरेको भन्दै बालेन शाहले प्रशंसा व्यक्त गरे। उनले भने, "महानगरले जरिवाना नखोजी, चेतना खोजेको हो । सार्वजनिक सम्पत्ति पनि आफ्नै सम्पत्ति हो, त्यसलाई जोगाउने चेतनशील समाजको निर्माण गर्न खोजिएको हो ।"
बालेन शाहले थप भने, "यहि शिक्षा तपाईंले आफ्नो विद्यार्थीहरूलाई पनि दिनुहोस् । हामी सबै मिलेर चेतनशील समाजको निर्माण गरौं। तपाईहरू त झन् शिक्षक हुनुहुन्छ, तपाईंहरूको ठुलो जिम्मेवारी र भूमिका छ यसमा ।"
उनीहरुले शिक्षकहरूलाई चेतनशील भएर आफ्नो कुरा राख्न र विद्यार्थीहरूको पढाइ प्रभावित नगरी कार्यक्रम गर्न आग्रह गरे । "गाउँ गाउँमा सिंहदरबार भन्ने त नारा मात्र भयो। आशा छ, एकदिन आफ्नो अधिकारको लागि काठमाडौं धाइरहनु नपरोस्," बालेन शाहले भने ।
बालेनका शब्दहरूले शिक्षकहरूको आन्दोलनलाई सकारात्मक दृष्टिकोणबाट हेर्नु र समाजमा परिवर्तन ल्याउनको लागि जिम्मेवारी निभाउनको महत्त्वलाई जोड दिएको छ।
-1729995576.jpeg)
