काठमाडौं | प्रधानमन्त्री केपी शर्मा ओलीले थाइल्याण्डको एसियन इन्स्टिच्युट अफ टेक्नोलोजी (एआइटी) मा आयोजित कार्यक्रममा मानव जातिको सुरक्षित र समृद्ध भविष्यका लागि साझा प्रयास गर्नुपर्ने आवश्यकता औंल्याए ।
थाइल्याण्डको औपचारिक भ्रमण र बङ्गालको खाडीको बहुक्षेत्रीय प्राविधिक तथा आर्थिक सहयोगका लागि बिम्स्टेकको छैटौँ शिखर सम्मेलनमा भाग लिन बैङ्कक पुगेका प्रधानमन्त्री ओलीले नेपाल सरकारको तर्फबाट मानवीय सुख, समृद्धि, सुरक्षा र आत्मसम्मानका लागि निरन्तर काम भइरहेको बताए ।
प्रधानमन्त्री ओलीले ‘समृद्ध नेपाल, सुखी नेपाली’ को राष्ट्रिय आकाङ्क्षा व्याख्या गर्दै मानवीय चाहनासहितको खुसीभन्दा ठूलो कुरा अर्को नहुने धारणा व्यक्त गरे । उनले जलवायु परिवर्तन जस्ता साझा मुद्दा सम्बोधनका लागि राष्ट्रिय, क्षेत्रीय र विश्वव्यापी रूपमा संयुक्त प्रयास गर्नुपर्नेमा जोड दिँदै विश्वसमुदायसँग आह्वान गरे ।
सम्बोधनमा, प्रधानमन्त्री ओलीले एआइटीबाट उत्पादन हुने जनशक्ति नेपालको जलस्रोत र अन्य विकासका क्षेत्रमा योगदान पुर्याउने विश्वास व्यक्त गरे ।
त्यसैगरी, प्रधानमन्त्री ओलीले एआइटीले नेपालमा स्थापना गरेको कोषमा एक लाख अमेरिकी डलर रकम जम्मा गर्ने घोषणा पनि गरे। थाइल्याण्डका लागि नेपाली राजदूत धनबहादुर वलीले एआइटीमा बढी विदेशी विद्यार्थी अध्ययन गर्दै नेपाल चौथो स्थानमा रहेको र एआइटीसँगको सहकार्य आफ्नो प्राथमिकतामा रहेको बताए ।
हाल एआइटीमा १८१ नेपाली विद्यार्थी अध्ययनरत छन् भने १,७९५ नेपाली विद्यार्थीले यहाँ अध्ययन पुरा गरेका छन् ।
प्रधानमन्त्री ओलीको भ्रमण दलमा प्रथम महिला राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक/विकास सल्लाहकार डा युवराज खतिवडा, नेपाल सरकारका मुख्यसचिव एकनारायण अर्याल र परराष्ट्र मन्त्रालयका सचिव अमृतबहादुर राई लगायतका व्यक्तिहरू समावेश छन् ।
प्रधानमन्त्री ओलीले आजै बिम्स्टेक सम्मेलनमा सहभागी सदस्य मुलुकका राष्ट्र प्रमुख तथा सरकारप्रमुखसँग 'साइडलाइन' भेटवार्ता गर्ने कार्यक्रम पनि राखेका छन् ।
-1729995576.jpeg)
