बर्दिया | नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बर्दियाको समृद्धिका लागि विशेष प्राथमिकता दिने बताएका छन् । मैनापोखरमा आयोजित जनतासँग माओवादी तराई–मधेस जागरण अभियानअन्तर्गतको खबरदारी सभामा उनले बर्दियाको पर्यटन विकास, भौतिक पूर्वाधार, शिक्षा, स्वास्थ्य र रोजगारका क्षेत्रमा निरन्तर प्रगति हुने बताए ।
दाहालले हुलाकी राजमार्गको निर्माण लामो समयदेखि अवरुद्ध रहेको उल्लेख गर्दै, आफू प्रधानमन्त्री हुँदा भारत सरकारको सहयोगमा यसलाई पुनः गती दिइएको स्मरण गरे ।
उनले बेपत्ता तथा शहीद परिवारलाई प्रमाणपत्र दिने व्यवस्था गरिएको जानकारी दिँदै, सत्य निरूपण तथा बेपत्ता छानबिनसम्बन्धी कार्यमा कानुनी रूपमा अब कुनै अवरोध नहुने कुरा प्रस्ट पारे ।
दाहालले दुई महिनाभित्र सत्य निरूपण र बेपत्ता छानबिन आयोगको सिफारिस समितिले काम थाल्ने जानकारी दिँदै, सहिद र बेपत्ता योद्धाहरूको सम्मानमा ऐतिहासिक बलिदान स्थलहरूमा पार्क निर्माण र पीडित परिवारलाई राहत दिने उल्लेख गरे। यसका साथै, एक सदस्यलाई रोजगारीको ग्यारेन्टी पनि गरिनेछ ।
सामाजिक न्यायको क्षेत्रमा उल्लेखनीय प्रगति भएको भन्दै, उनले १५ लाखभन्दा बढी वैदेशिक रोजगारीमा गएका नेपाली नागरिकलाई सामाजिक सुरक्षा कोषमा आबद्ध गरिएको बताए ।
-1729995576.jpeg)
