रौतहट जिल्लाको वृन्दावन नगरपालिका–१ स्थित बलेरी खोरमा जंगली बँदेल मार्न थापिएको विद्युतीय पासोमा परेर एक महिलाको ज्यान गएको छ ।
मृत्यु पश्चात शव लुकाउन खोजिएको घटनाले स्थानीय क्षेत्रमा सनसनी फैलिएको छ । मृत्यु हुनेमा सोही स्थानकी ४५ वर्षीया फूलमतिया देवी रहेको जिल्ला प्रहरी कार्यालय रौतहटले पुष्टि गरेको छ । प्रहरीका अनुसार, उनी चैत्र १४ गते बिहान गोठबाट घर फर्कने क्रममा स्थानीय सुशिल विश्वकर्माको मकैबारी हुँदै आइरहेकी थिइन् ।
उक्त खेतमा जंगली बँदेलबाट अन्नबाली जोगाउनको लागि नाङ्गो तारमा करेन्ट प्रवाह गरेर धराप थापिएको थियो । सोही पासोमा परेर फूलमतियाको घटनास्थलमै मृत्यु भएको प्रारम्भिक अनुसन्धानबाट खुलेको छ । महिलाको मृत्यु भएपछि, स्थानीय सुशिल विश्वकर्मा र जितेन्द्र पटेलले मिलेर घटनास्थलबाट करिब ४ किलोमिटर उत्तरतर्फ रहेको रामलाल साझेदारी वनमा खाल्डो खनेर शव गाडेको प्रहरी अनुसन्धानले देखाएको छ ।
महिलाको परिवारले प्रहरीमा बेपत्ताको उजुरी गरेपछि खोजतलास सुरु गरिएको थियो । प्रहरीको तालिमप्राप्त कुकुरको सहयोगमा वैशाख १९ गते जंगलभित्र खाल्डोमा गाडिएको अवस्थामा फूलमतिया देवीको शव फेला परेको थियो । घटनामा संलग्न रहेका दुबै जनालाई प्रहरीले नियन्त्रणमा लिएको छ । प्रारम्भिक बयानपछि उनीहरूलाई कर्तव्य ज्यान मुद्दा अन्तर्गत अनुसन्धान भइरहेको रौतहटका प्रहरी प्रमुख एसपी दिलीप घिमिरेले जानकारी दिएका छन् ।
उनका अनुसार, उक्त कार्य योजनाबद्ध रूपमा भएको आशंका गरिएको छ र घटनामा थप संलग्नता भए/नभएकोबारे पनि अनुसन्धान जारी छ। पक्राउ परेका दुबै जनालाई शुक्रबार पत्रकार सम्मेलनमार्फत सार्वजनिक गरिने भएको छ । घटनाले जंगली जनावर नियन्त्रण गर्ने नाममा प्रयोग हुँदै आएको अवैध र खतरनाक उपायमाथि प्रश्न उठाएको छ ।
स्थानीय निकाय र सरोकारवाला निकायहरूले यस्ता घटनाको रोकथामका लागि थप पहल गर्नु आवश्यक देखिएको छ ।
-1729995576.jpeg)
