बाराको मानवत–पिलुवा–मटिअर्वा सडकखण्डअन्तर्गत कलैयामा रहेको करिब ३ किलोमिटर सडक निर्माण कार्य लामो समयदेखि अलपत्र परेको छ ।
निर्माणका नाममा गिट्टी, माटो थुपारेर छाडिएपछि स्थानीय बासिन्दा धुलो र फोहोरले प्रताडित बनेका छन् । जनताले पटक–पटक आन्दोलन गर्दा पनि सडक निर्माणमा सुधार नआएपछि उनीहरू आक्रोशित बनेका छन् ।
सडक निर्माणमा भइरहेको ढिलासुस्ती, लापरबाही र गैरजिम्मेवार कार्यशैली विरुद्ध स्थानीयवासी लगातार आवाज उठाउँदै आएका छन्। यही सन्दर्भमा प्रतिनिधिसभाको उद्योग, वाणिज्य तथा श्रम र उपभोक्ता हित समितिको अनुगमन टोलीले शुक्रबार स्थलगत निरीक्षण गरेको छ । समितिका संयोजक एवं बारा क्षेत्र नम्बर ४ का सांसद कृष्ण कुमार श्रेष्ठ ‘किसान’ नेतृत्वको टोलीले अनुगमनको क्रममा स्थानीयहरूसँग प्रत्यक्ष संवाद गरेको थियो । स्थानीयहरूले सरकार, ठेकेदार र सरोकारवालाप्रति आक्रोश व्यक्त गर्दै आफ्नो दुःख सुनाएका थिए ।
अनुगमन टोलीमा कलैया उपमहानगरपालिकाका नगरप्रमुख विनोद साह, बारा प्रमुख जिल्ला अधिकारी बसन्त अधिकारी, पूर्व सांसद तथा जसपा नेता रामबाबु यादव, योजना कार्यालय वीरगञ्जका अधिकारीलगायत सरोकारवाला सहभागी थिए । अनुगमनपछि सांसद श्रेष्ठले ठेकेदार होमनाथ गौतमलाई मंगलबारसम्म काम सुरु नगरे ठेक्का रद्द गरी नयाँ ठेक्का प्रक्रिया अघि बढाउने चेतावनी दिएका छन् ।
सडक निर्माणको जिम्मा लिएका ठेकेदार होमनाथ गौतमले भने काम सुरु गर्न ढिला हुनुको कारण खानेपानीको पाइप लाइन, विद्युत पोल र मुआब्जा विवाद भएको बताएका छन् । उनले अब समस्या समाधान भइसकेको भन्दै आजैबाट काम सुरु गर्ने दाबी गरेका छन् ।
गौतमका अनुसार, “पाइप विछ्याउने काम सकिएको छ, विद्युत पोल अझै नहटाइए पनि अब नगर प्रमुख र हुलाकी राजमार्ग निर्देशनालयको समन्वयमा काम अघि बढाउने तयारीमा छु ।”
यता नगरप्रमुख विनोद साहले ठेकेदारको लापरवाहीप्रति कडा असन्तुष्टि जनाउँदै बिहीबार नगर कार्यकक्षमा पत्रकार सम्मेलनमार्फत सडक निर्माण तत्काल सुरु नभए आमरण अनशन बस्ने चेतावनी दिएका थिए । तर ठेकेदार गौतमले नगरप्रमुखको चेतावनीलाई "स्टन्ट" मात्र भएको" भन्दै आरोप खारेज गरेका छन् । स्थानीयवासीहरू भन्छन्, "बरु सधैंको लागि निर्माण रोक्नू, तर माटो थुपारेर धुलो उडाउने, झुटा आश्वासन दिने नाटक नगर्नू ।"
उनीहरूले सांसद र सरकारसँग निर्माणको काम तत्काल शुरु गरी गुणस्तरीय सडक निर्माण सुनिश्चित गर्न माग गरेका छन् ।
-1729995576.jpeg)
