नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल 'प्रचण्ड' ले हालको सरकारलाई दलाल र बिचौलियाले बनाइदिएको सरकार भएको आरोप लगाएका छन् ।
मिर्चैयामा मंगलबार बिहान आयोजित कार्यकर्ता भेटघाट कार्यक्रममा सम्बोधन गर्दै दाहालले भ्रष्टाचारविरोधी अभियानले कांग्रेस र एमालेका नेताहरूलाई आतंकित बनाएको र उनीहरूकै डरले दलाल र बिचौलियाको सहयोगमा सरकार बनेको बताएका हुन् । दाहालले ठूला भ्रष्टाचारी र अत्याचारीहरूलाई कारबाही गर्न थालिएपछि कांग्रेस र एमालेका नेताहरूलाई पनि पक्राउ पर्ने डरले चिन्तित बनाएको र त्यसैको परिणामस्वरूप अँध्यारा कोठामा दलाल र बिचौलियाहरूले मिलेर अहिलेको सरकार बनाएको आरोप लगाए ।
उनले भने, "ठूला भ्रष्टाचारीहरू पक्राउ पर्न थालेपछि कांग्रेस र एमालेका नेताहरू आफू पनि पर्न सक्ने डरले आतिए । अनि दलाल र बिचौलियाहरूले अँध्यारा कोठामा उनीहरूलाई मिलाइदिए ।" दुई ठूला दलहरू कांग्रेस र एमालेको मिलन संसदीय व्यवस्थाका लागि अप्राकृतिक र अस्वाभाविक भएको पनि दाहालले बताए । उनले यो सरकार बनाउनुको पछाडि स्वार्थ रहेको र यसरी बनेको सरकारले मुलुक र जनताका हितमा काम गर्ने अपेक्षा नराखे पनि हुने बताए ।
दाहालले आफू प्रधानमन्त्रीको दौडमा नरहेको स्पष्ट पार्दै भने, “म प्रधानमन्त्री बन्ने रेसमा छैन, हामी सरकार बनाउन लाग्दैनौं । हामी अब पार्टी बनाउने काममा जुटेका छौं ।” साथै, उनले आगामी चुनावमा आफ्नो पार्टी पहिलो बन्ने दाबी पनि गरे । सिरहावासीप्रति आभार प्रकट गर्दै दाहालले संविधान नै बन्न नदिने षड्यन्त्र भएको बेला सिरहावासीले उनलाई जिताएर ठूलो काम गरेको उल्लेख गरे । उनले भने, "जाली फटाहाहरूले संविधान नै बन्न नदिने षड्यन्त्र गरेका थिए, तर सिरहावासीले मलाई जिताएर दुष्टहरूको षड्यन्त्र असफल पारिदिए ।"
दाहालले आगामी दिनमा आफ्नो पार्टीलाई मजबुत बनाउँदै भ्रष्टाचारविरोधी अभियानलाई निरन्तरता दिने बताएका छन् । उनले मुलुकमा सुशासन र पारदर्शिता कायम गर्न आफ्नो पार्टी दृढ रहेको भन्दै कार्यकर्ताहरूलाई जागरूक र एकजुट रहन आग्रह गरे ।
-1729593135.jpg)
-1731330003.png)
